«Պահանջում ենք պատժել «Հարսնաքարում» տեղի ունեցած միջադեպի բոլոր մեղավորներին» քաղաքացիական նախաձեռնության անդամ, հրապարակախոս Զարուհի Հովհաննիսյանին զարմացրել են քաղաքացիական նախաձեռնությունների պահանջների նպատակահարմարության վերաբերյալ «Հելսինկյան ասոցիացիայի» իրավապաշտպան կազմակերպության ղեկավար Միքայել Դանիելյանի կասկածները:
Հիշեցնենք, որ Մ. Դանիելյանը Epress.am-ին տված հարցազրույցում ասել էր, որ հասարակական ակտիվության մեջ շատ անհասկանալի բաներ կան ու այդ շարժումները վստահություն չեն ներշնչում. «Բարգավաճ Հայաստան» կուսակցության առաջնորդ Գագիկ Ծառուկյանը նույն հաջողությամբ ղեկավարում է Հայաստանի ազգային օլիմպիական կոմիտեն: Եվ ի՞նչ: Նրա թիկնապահները մարդ չե՞ն ծեծել: Կամ Սերժ Սարգսյանի չի՞ ղեկավարում Շախմատի ֆեդերացիան: Իսկ նրա թիկնապահները կամ ուժային մարմինները մարդկանց չե՞ ն սպանել: Սպանել են, սպանում են և սպանելու են: Ինչո՞ ւ Օլիմպիական կոմիտեն ձեռք չեն տալիս: Թե՞ այնտեղ օլիմպիական չեմպիոններ են, և Ծառուկյանը կարող է նախաձեռնությունը ծեփել պատին, այո՞»:
Ի պատասխան պարոն Դանիելյանի տեսակետի, Զ. Հովհաննիսյանը Aravot.am- ի հետ զրույցում ասաց. «Ակտիվիզմը զարգանում է այն ժամանակ, երբ մասսայական խեղդվում է մարդու գործունեությունն ու տարբեր իրավունքներ: Մեր երկրում արդարադատությունն իր գործառույթը չի կատարում, այդ պատճառով էլ ամբողջ հասարակությունը արտահայտում է իր անհամաձայնությունը նման գործելաոճի վերաբերյալ: Կոնկրետ Ռուբեն Հայրապետյանը պետական այր է, ՀՀԿ անդամ, նրա գործունեությունը բոլորը գիտեն, նրա բռնության քարոզը միշտ հեռուստատեսությամբ ու հնարավոր մասսայական վայրերում նկատվում է: Եթե հասարակությունը քաղաքացիական շարժում է սկսել նման ապրելակերպի դեմ, չեմ կարծում՝ պարսավելի է, ու մարդու իրավունքների ցանկացած պաշտպան պետք է ողջունի նման քայլը»:
Նա բացառեց քաղաքացիական նախաձեռնությունների՝ քաղաքական ուժերի կողմից ուղղորդվելու վերաբերյալ պարոն Դանիելյանի եւ նրա նման մտածողների տեսակետը. «Սա կազմակերպված գործողություն է… ժողովուրդը զրկված է ընտրությունների միջոցով իշխանություն ձեւավորելու հնարավորությունից. դա հիմա հնարավոր է միայն հասարակական շարժումների, կարծիքների ձեւավորման միջոցով: Պետք է ստեղծել մի իրավիճակ, որով ամենաթողության մթնոլորտը հաղթահարվի»:
Կարդացեք նաև
Արփինե ՍԻՄՈՆՅԱՆ
