Օգոստոսի 1-ից մեկ ծննդի հաշվով ծննդօգնության գները մարզերում եւ Երեւանում նույնականացվել են, որի համար լրացուցիչ մոտ 300 մլն դրամ կուղղվի մարզերի ծննդատներ։
«Առավոտի» հետ զրույցում ՀՀ առողջապահության նախարարության աշխատակազմի ղեկավար Սուրեն Քրմոյանը վստահեցրեց, որ առողջապահության նախարարի այս հրամանով այժմ մարզերի ծննդատների ծառայություններն էլ, բացառությամբ բարդ դեպքերի, կմատուցվեն այն գներով, ինչը որ եղել է Երեւանում: Սա պարոն Քրմոյանի ներկայացմամբ՝ կկանխի մարզերի ծննդկանների ու նաեւ բժիշկների արտահոսքը մայրաքաղաք, քանի որ կբարելավվի թե ծննդօգնության ծառայությունների մակարդակը, եւ թե բժիշկների աշխատավարձը կբարձրանա: Նախկինում, ըստ պարոն Քրմոյանի, ծննդօգնության գումարները, որը պետության հաշվին է, բաշխվում էր ըստ ծննդատների մակարդակների. «Այժմ բոլոր 3 մակարդակի ծննդատներին սովորական ծնունդների դեպքում կփոխանցվի նույն գումարը, քանի որ բոլորն էլ նույն աշխատանքն են տանում, եւ մարզերի բժիշկներն էլ արդարացի կվարձատրվեն իրենց աշխատանքի դիմաց: Իսկ եթե բարդ ծննդաբերություն լինի, ապա այդ դեպքում, ըստ ծննդատան մակարդակի, գումար կփոխանցվի»:
Պարոն Քրմոյանի հավաստմամբ՝ նախկինում մայրաքաղաքի ծննդատներում սովորական ծննդօգնությունն արժեր մոտ 100 հազար դրամ, մարզերում՝ մոտ 90 հազար, իսկ օգոստոսի 1-ից պետությունը մեկ սովորական ծննդօգնության համար բուժհիմնարկին կփոխանցի մոտ 107 հազար դրամ, բարդ ծննդաբերության թարմացված գինը 160 հազար դրամ է: ԱՆ աշխատակազմի ղեկավարի խոսքերով՝ ծննդօգնության նորացված գները փոխանցել են ֆինանսների նախարարություն, որը դեռ պետք է ուսումնասիրի եւ հաստատի գները:
Ըստ պարոն Քրմոյանի՝ նախկինում 3-րդ մակարդակի ծննդատները, ինչպիսիք են օրինակ՝ Հանրապետական կլինիկայի ծննդատունը, Էրեբունի հիվանդանոցի ծննդատունը, «Գրիգոր Լուսավորիչը» եւ Մոր ու մանկան առողջության պահպանման կենտրոնը, սովորական ծննդօգնության համար ավելի բարձր գումար էին ստանում պետությունից, քան 1-ին եւ 2-րդ մակարդակի ծննդատները:
ՆԵԼԼԻ ԲԱԲԱՅԱՆ
«Առավոտ» օրաթերթ
