Հայ գրատպության 500-ամյակին և Նավասարդին նվիրված «Սերունդ» հայապահպան միավորումը, Հայ խոհարարական ավանդույթների զարգացման և պահպանման ՀԿ-ները նախաձեռնել են «Օգոստոսի 11, Նավասարդ-թոնրատոն» փառատոնը: Այն կանցկացվի Գեղարքունիքի մարզի լեռնային Ծաղկունք գյուղում: Փառատոնը կմեկնարկի օգոստոսի 11-ին՝ Հայկ նահապետի հուշարձանի մոտ պսակադրման արարողությամբ: Կանցկացվեն նաև հայ գրատպության պատմության վերաբերյալ դասախոսություններ, փաստագրական ֆիլմերի ցուցադրություն, տոնական համերգ և Նավասարդյան խաղեր: Կկազմակերպվի նաև տոնավաճառ, որտեղ կարելի է ծանոթանալ Ծաղկունք գյուղի մածունին, մեղրին, ուրցին և այլ բարիքներին: «Սերունդ հայապահպան միավորում» ՀԿ-ի նախագահ Հայկ Չոբանյանը մանրամասնեց. «Միջոցառումները կսկսեն օգոստոսի 10-ին Արագածում, որտեղից կրակը կբերվի Հայկ նահապետի արձանի մոտ: Այստեղ կվառվեն երեք ջահեր, որոնցից մեկը կտարվի Ծաղկունք, երկրորդը՝ Հարթագյուղ, որտեղ հիմնավորվեց տոնը նշելու գաղափարը և երրորդը՝ Գառնի»: Պարոն Չոբանյանը նաև շարունակեց. «2008-ից սկսած տարբեր միջոցառումներ ենք կազմակերպում ուղղված հայապահպանությանը: Կարծում ենք, որ Նավասարդը մեր պետական տոնացույցում կարող է իր ուրույն տեղն ունենալ, առավել ևս, որ մեր տոնացույցն այնքան էլ հարուստ չէ: Նավասարդին մարդիկ մեկ շաբաթ, կամ մեկ ամիս առատության օրեր էին հայտարարում և ներկայանում առատ սեղաններով»:
Հայ խոհարարական ավանդույթների զարգացման ու պահպանման ՀԿ նախագահ Սեդրակ Մամուլյանն էլ ներկայացրեց, թե թոնրի մոտ ինչ միջոցառում է տեղի ունենալու. «Տեղի է ունենալու թոնրի մեջ պատրաստվող ուտեստների ցուցադրություն ութ թոնիրներում: Սակայն ջահով վառված թոնրում միայն լավաշ է թխվելու: Սա առիթ կլինի և խթան կհանդիսանա մեր ազգային խոհանոցի զարգացմանը: Իսկ ամենակարևոր ուտեստը ծիսական քաշիգա ուտեստն է, այն պատրաստվում է թոնրի մեջ և այդ ուտեստը ՅՈՒՆԵՍԿՕ-ն ընդունեց որպես Թուրքիայի տարածքում պատրաստվող կերակրատեսակ: Այնինչ Նոր Տարուն հայերը պատրաստել են այդ ուտեստը, որը հարիսայից տարբերվում է նրանով, որ չեն խառնում, որպեսզի գալիք տարին խառնակ չլինի»:
Տաթև ՀԱՐՈՒԹՅՈՒՆՅԱՆ
