Արագածոտնի մարզի Օհանավան գյուղի բնակիչներից այս տարի «Սպայկա» ընկերությունը մոտ 30միլիոն դրամի միրգ է վերցրել ու գումարները չի տալիս: Գյուղացիների շրջանում բողոքի մեծ ալիք է բարձրացել: Այս մասին Aravot.am-ին փոխանցեց Օհանավանի գյուղապետ Ալեքսան Ալեքսանյանը: Ըստ նրա գյուղացիները կեռաս. ծիրան ու բալ են ընկերությանը հանձնել ու «Սպայկայի» հետ առաջին տարին չէ, որ համագործակցում են.«Նախորդ տարի տարել են, բարեխղճորեն բերել գումարները տվել են մարդկանց: Այս տարի իրենց ասած ժամկետին չտվեցին»:
Գյուղապետի խոսքերով, ընկերությունից տուժել են նաեւ Ուշի ու Կարպի գյուղերի բնակիչները: Պարտքերի մասին տեղեկությունները մեր զրույցում հաստատեց նաեւ Կարպիի գյուղապետի տեղակալ Մելքոն Մայիլյանը. Ըստ նրա` իրենց գյուղում ընկերության պարտքը հասնում է 60 միլիոն դրամի. գյուղացիները հիմանականում կեռաս են հանձնել ընկերությանը: Գյուղապետի խոսքերով, ընկերությունը գյուղացիների հետ աշխատում է առանց պայմանագրերի ու նախորդ տարի էլ էր պարտքեր կուտակել ու մարել դեկտեմբերին.«Այսօր գյուղացիները գնացել են «Սպայկա», ասել են մինչեւ այս ամսվա 22-ը կտանք»:
Հետաքրքիր է, որ գյուղացիների դժգոհությունները Aravot.am-ի զրույցում կտրականապես հերքեց ընկերության զարգացման գծով փոխտնօրեն Կարեն Բաղդասարյանը. «Նման բան չկա , ով որ նման հարց է բարձրացրել, իրենց հետ միասին եկեք այստեղ, հասկանանք` այդ ով է նման խնդիր բարձրացնում… հերյուրանքներ են»:
Նա ասաց, որ Արագածոտնի մարզում ոչ մի համայնքի բնակիչներին պարտքեր չունեն:
Կարդացեք նաև
Արփինե ՍԻՄՈՆՅԱՆ
