Այսօր Aravaot.am-ը Շիրակի գեներալ մարզպետ Աշոտ Գիզիրյանից հետաքրքրվեց` արդյո՞ք ՏԻՄ ընտրություններն այնքան լարված են լինելու Գյումրիում և ընդհանրապես Շիրակի մարզում , որ ՀՀ ոստիկանապետը հատուկ հանձնաժողով է ստեղծում, խմբեր է ուղարկում: «Ես միայն Շիրակի մարզի մասին կարող եմ խոսել, չեմ կարծում, որ ընտրությունները լարված են լինելու: Իսկ թե ոստիկանությունը ինչ աշխատանքային հատուկ խմբեր ու հանձնաժողովներ է ստեղծել, այդ հարցը պետք է տաք ոստիկանությանը», -ասաց պարոն Գիզիրյանը: Այն հարցին էլ, թե չեք կարծո՞ւմ, որ ընտրությունների ժամանակ դրսից բերված ոստիկանական մեքենաներն ու հատուկ խմբերը ավելորդ լարվածություն են ստեղծում բնակչության մոտ, նախկին ոստիկանապետ Աշոտ Գիզիրյանն այսպես արձագանքեց. «Չեմ կարծում, որ ոստիկանության աշխատակիցների գործողությունները ավելորդություն են: Նրանք ավելի շատ են իրազեկված օպերատիվ ինֆորմացիայով, քան մենք:Նրանք գիտեն, որտեղ ինչքան ուժեր պետք է կուտակեն և ինչ գործողություններ պետք է իրականացնեն , դա ուղղակի առաջին հայացքից այդպես է թվում մարդկանց , ուրեմն ոստիկանները ինչ-որ տեղ հիմք ունեն, գիտեն, որտեղ ուժեղացնեն ծառայությունը, որտեղ խնդիրներ կարող են լինել, որտեղ են ընդհարումներ սպասվում»:
Շիրակի մարզպետի հետ հարցազրույցն ամբողջությամբ ընթերցեք վաղվա տպագիր «Առավոտում»:
Նունե ԱՐԵՎՇԱՏՅԱՆ
