Լինելով ոչ ծովային երկիր` առանձնապես հարուստ չենք ձկնատեսակներով, մեզ մնում է այդ աղքատիկ տեսականին բազմազանացնել` դրանց պատրաստման եղանակների հաշվին: Իշխանը սովորաբար խաշում են, երբեմն` գինու մեջ եփում, պատահում է` լոլիկով շոգեխաշում են, որոշ տանտիկիններ` լավաշի մեջ դնում են ջեռոցը, որոշ տղամարդիկ խորովում են կրակի վրա…
Որպես այլընտրանք` այսօր առաջարկում եմ իշխանի պատրաստման այլ տեսակ, որը ճիշտ է, մի քիչ աշխատատար է, մի քիչ էլ` ծախսատար, քանի որ պետք է ազատվենք գլխից եւ փշերից, սակայն, հավատացնում եմ, արդյունքը լիովին արդարացնում է իրեն:
Եվ այսպես` հինգ-վեց հոգու համար մեզ անհրաժեշտ է.
երեք միջին կամ երկու խոշոր իշխան
Կարդացեք նաև
մեկ տուփ կարագ
մեկ պճեղ սխտոր
մեկ լիմոն
կես կապ մաղադանոս
աղ եւ թարմ աղացած պղպեղ
Պատրաստման եղանակը
Ամենասկզբում պետք է պատրաստենք կանաչիով կարագը: Այս կարագը կարելի է պատրաստել նախօրոք, անգամ` մի քանի օր առաջ: (Կարագի ավելացած կտորը կարելի է հետագայում օգտագործել նաեւ խաշած կամ ջեռոցը դրած կարտոֆիլի հետ, կարելի է դնել ջեռոցում տապակվող մսի կամ հավի կրծքամսի վրա, կարելի է ավելացնել մակարոնեղենին, մի խոսքով` ձեռքի տակ պետք կլինի):
Սենյակային ջերմաստիճանի հասած փափուկ կարագին ավելացնել շատ մանր կտրատած մաղադանոսը, սխտորը, լիմոնի կեղեւը եւ մեկ ճաշի գդալ լիմոնի հյութ:
Լավ հարել հարիչով, ապա միասեռ զանգվածը լցնել բարակ պոլիէթիլենե տոպրակի վրա, եւ այդ տոպրակը ձիգ փաթաթել, որ կարագը երշիկի տեսք ստանա: Դնել սառնարան առնվազն երեք ժամով:
Հիմա անցնենք ձկանը: Կտրում ենք ձկների գլուխները, որոնքը կարելի է դնել սառցարան` հետո ձկնապուր պատրաստելու համար: Եվ անցնում ենք ամենադժվար մասին` ձկան ֆիլեն հանելը: Դրա համար պետք է շատ սուր դանակ, որով նախ պատռում են ձուկը` մեջքից, ապա դանակը անցկացնելով ողնաշարի եւ ձկնամսի մսի արանքով, այնպես ենք անում, որ ողնաշարը մնա ներքեւում, ապա նույն գործողությունը անում ենք հակառակ կողմից:
Այսպիսով` ողնաշարը դուրս է գալիս եւ ունենում ենք մեկ ձկից երկու ամբողջական ֆիլե: Եթե ձուկը մեծ է, ֆիլեն կարելի է մասնատել մի քանի կտորի: Եթե ժամանակ ունեք կամ շատ բծախնդիր եք, կարող եք ֆիլեից հեռացնել մնացած փշերը եւս, սակայն այդ մի գործողությունը հնարավոր է բաց թողնել` ուտողներն իրենք կանեն:Ձկան փափկամսի կտորները դասավորում ենք ջեռոցի թավայի մեջ, որի վրա փռված է յուղաթուղթ` (калька): Հաճախ տնտեսուհիները չգիտեն, թե որտեղի՞ց գտնել յուղաթուղթ: Այժմ սուպերմարկետներում վաճառվում են նման թղթեր` “Бумага для выпикания”, որոնք շատ հարմար են եւ թխվածքների եւ ջեռեփ ուտեստների համար:
Ձկան կտորներին աղ եւ պղպեղ անել, ապա կանաչ կարագից կտրել կտորներ եւ դնել ամեն ձկան վրա մի կտոր: Դնել 200-220 աստիճանով տաքացրած ջեռոցը` 20-30 րոպեով:
Մատուցել թարմ բանջարեղենային աղցանի, բրնձի կամ տապակած բանջարեղենի հետ: Եվ իհարկե, չմոռանաք սպիտակ գինին:
Ի դեպ, եթե ժամանակ կամ ցանկություն չունեք իշխանը ոսկրահան անելու, կարող եք ամբողջական իշխանը պատրաստել կանաչ կարագով: Աղ եւ սեւ պղպեղ արած ձկան երկայնքով խորը կտրվածքներ արեք՝ մինչեւ ոսկորը (տես՝ լուսանկարում), այդ փորվածքի մեջ աղ արեք, մտցրեք կանաչ կարագի կտորները: Իսկ ձկան փորի մեջ դրեք չկտրտած կանաչի՝ թարխուն, մաղադանոս, եւ լիմոնի կտորներ: Բնականաբար, ձուկը նաեւ ներսի կողմից է պետք աղ եւ պղպեղ անել:
Քսան րոպե լավ տաքացրած ջեռոցում 250 աստիճանի տակ եփելուց հետո եւս 5-7 րոպեով ձուկը դրեք ջեռոցի ամենավերեւի հատվածում՝ թող լավ կարմրի:
Բարի ախորժակ
