Այսօր`սեպտեմբերի 9-ին, Հայաստանի 481 համայնքներում սկսվել են ՏԻՄ ընտրություններ:
Արդեն ահազանգ կա Գյումրիից: Asparez.am-ի տարածած տեղեկությունների համաձայն, Գյումրիի տեղամասերից ահազանգ է ստացվել, որ անձնագրերում դրվող դրոշմակնիքների թանաքը ցնդում է, իսկ ԿԸՀ-ից հանձնարարել են սովորական թանաքով սկսել կնքել անձնագրերը:
Ահազանգ է ստացվել նաեւ Գյումրիի 34/74 ընտրատեղամասից (12 մանկապարտեզ, Լազոյի փողոց), թե տեղամասի առաջ՝ 50 մետրից ավելի մոտ տարածքում խմբված ջահելությունը բոլոր մտնողներին կոչ է անում քվեարկել ավագանու անդամության թեկնածուներից 18 համարի օգտին: Մի քանի վստահված անձինք առայժմ բանավոր բողոքով դիմել են հանձնաժողովի նախագահին:
Այս ահազանգերի վերաբերյալ Կենտրոնական ընտրական հանձնաժողովից Aravot.am-ին պարզաբանեցին. «Հայաստանի տարածքում մի քանի տեղամասերում նման խնդիր եղել է, եզակի դեպքեր են, բայց այն շատ արագ լուծվել է՝ ավելացվել են սովորական թանաք»:
Կարդացեք նաև
Իսկ ավագանու անդամության թեկնածուներից 18 համարի օգտին քվեարկելու քարոզչության դեպքի մասով ԿԸՀ-ից ասացին, որ դրա մասին համապատասխան մարմինները տեղեկացվել են, ու կարգի պահպանման աշխատանքներ են տարվում:
Արփինե ՍԻՄՈՆՅԱՆ
