Ինչպես տեղեկացրել ենք, երեկ Գյումրու նորընտիր քաղաքապետ Սամվել Բալասանյանը իր ընտանիքին պատկանող Գյումրու գարեջրի գործարանի ռեստորանում քեֆ-ուրախություն է կազմակերպել` տոնելով իր հաղթանակը: Նա, ըստ մասնակիցների, մատաղ է արել ու իրեն սատարած գյումրեցի բոլոր տղամարդկանց `անկախ կուսակցական պատկանելությունից, հրավիրել է: Արդյունքում, ըստ ականատեսների, հրավիրված 250-300 հոգու մեջ ՀՀԿ-ականներն ավելի շատ են եղել, քան ԲՀԿ-ականները: Ապագա քաղաքապետը հրավիրել է Շիրակի մարզպետարանի ու մարզպետարանի ենթակայության տակ գտնվող կառույցների ՀՀԿ-ականներին, այդ թվում նաև որոշ դպրոցների տնօրենների, ովքեր խնջույքի են մասնակցել երկու ՀՀԿ-ական փոխմարզպետերի` Սեյրան Պետրոսյանի ու Հարություն Արշակյանի գլխավորությամբ:
Ի դեպ, Գյումրու նորընտիր քաղաքապետը, ի նշան հետագա համագործակցության, հրավիրել է նաև Արթիկի նորընտիր քաղաքապետ ՀՀԿ-ական Արսեն Աբրահամյանին: Պարոն Բալասանյանը բնականաբար չի անտեսել նաև իրեն սատարած ԲՀԿ-ականներին, օրինակ` Գյումրու մանկավարժականի ռեկտոր Վարդևան Գրիգորյանին, ԱԺ նախկին պատգամավոր Ռոբերտ Զաքարյանին: Սակայն հետաքրքիրն այն է , որ քաղաքական խնջույքին Գյումրիից ընտրված ԱԺ ոչ մի պատգամավոր չի մասնակցել. ոչ ՀՀԿ-ականներ Սուքիաս Ավետիսյանն ու Աշոտ Աղաբաբյանը, ոչ ԲՀԿ Շիրակի մարզային կառույցի ղեկավար, ԱԺ պատգամավոր Մարտուն Գրիգորյանը, և առավել ևս ոչ էլ ՕԵԿ-ական Հովհաննես Մարգարյանը: Նրանք, ինչպես հայտնի է, Սամվել Բալասանյանին տարբեր պատճառներով չեն սատարել:
Մենք Սամվել Բալասանյանի մամլո խոսնակ Զոհրաբ Եգանյանից հետաքրքվեցինք, թե ինչո՞ւ պատգամավորները չեն հրավիրվել, որին ի պատասխան նա ասաց. «Պարոն Բալասանյանը ընտրություններից հետո մշտապես շնորհավորանքներ ու հյուրեր է ընդունել, և եթե ինչ-որ մեկը մեկ միջոցառման չի մասնակցել, ապա այդ անձը մասնակցել է մեկ այլ միջոցառման, այցելել է, շնորհավորել է, այնպես որ` ոչ մի տարօրինակ բան չկա , ամեն ինչ նորմալ է»:
Նշենք, որ մարզպետ Աշոտ Գիզիրյանը ևս այդ օրը Շիրակի մարզում չլինելու պատճառով խնջույքին չի մասնակցել:
Կարդացեք նաև
Նունե ԱՐԵՎՇԱՏՅԱՆ
