Վերլուծաբան Անդրեաս Ղուկասյանի գնահատմամբ, Վրաստանում ընդդիմության հաղթանակը հնարավոր է փոխի ռուս-վրացական հակադրության ձեւաչափը: «Վստահ եմ, որ Վրաստանում նոր իշխանություններն ունեն Ռուսաստանի հետ ավելի քաղաքակիրթ հարաբերություններ ունենալու կարողությունը»,- այսօրվա ասուլիսում ասաց պարոն Ղուկասյանը:
Նրա կարծիքով, արմատական հարցերում, օրինակ Հարավային Օսեթիայի եւ Աբխազիայի հարցում, Ռուսաստանը պահպանելու է նույն դիրքորոշումը. «Այդ կոնֆլիկտը երկար պահպանվելու է, իշխանափոխության խնդիրը չի կարող նման հարցերի վրա ազդել: Ամեն նոր իշխանություն, որպես ժառանգություն՝ ստանալու է այդ խնդիրները: Պարզապես հարաբերությունները կմտնեն քաղաքակիրթ երկխոսության ֆորմատ»:
Նա նաեւ կանխատեսեց, թե ամենայն հավանականությամբ, Սահակաշվիլին ժամկետից շուտ հրաժարական կտա, որովհետեւ նոր իրավիճակ է Վրաստանում ստեղծվել:
Ասուլիսի մյուս մասնակցի՝ վերլուծաբան Շուշան Խաթլամաջյանի գնահատմամբ էլ, Վրաստանի խորհրդարանական ընտրությունները իշխանությունը սահուն փոխանցելու ձև էին. «Եթե ժամանակին Ռուսաստանի ղեկավարությունը հայտարարել է, որ Սահակաշվիլիի հետ խոսելու բան չունի, հիմա այդ իրավիճակը փոխվել է և կարծում եմ, որ հիմա երկխոսություն կփորձեն անել, որը երկու կողմերի համար էլ ձեռնտու է»:
Կարդացեք նաև
Նրա կարծիքով, Հայաստանի համար Վրաստանը կարևոր հարևան է, բայց նոր իշխանությունների գործոնը հայ-վրացական հարաբերություններում փոփոխություններ չեն բերի: «Կայուն Վրաստանը Հայաստանի շահն է: Այն ինչ-որ կատարվում է Վրաստանում, Հայաստանի համար դրական է, չնայած Հայաստանի իշխանությունների համար իրադրությունը բարդ է և անորոշ»,- հավելեց պարոն Ղուկասյանը:
Արփինե ՍԻՄՈՆՅԱՆ
