Այսօր լրագրողները ՀՀԿ-ի ու ԲՀԿ-ի համատեղ թեկնածու, Գյումրու նորընտիր քաղաքապետ Սամվել Բալասանյանից հետաքրքրվեցին` եթե նախագահական ընտրությունների ժամանակ այս երկու կուսակցություննեը միասնական թեկնածու չունենան ու ամեն մեկը առաջադրի իր սեփական թեկնածուին, ո՞ւմ կսատարի Սամվել Բալասանյանը: Վերջինս խուսափեց այդ հարցին պատասխանելուց` նշելով, որ դա կապ չունի այսօրվա իրադարձության` իր` Գյումրու քաղաքապետ ձեռնադրվելու հետ: «Քաղաքական հարցերը, ոնց որ պարոն Ծառուկյանը մի անգամ ասեց` էդ մասին հաջորդ դասին»,- կարճ կապեց պարոն Բալասանյանը:
Սակայն նրան օգնության հասավ Շիրակի գեներալ մարզպետը` առաջարկելով անձամբ պատասխանել այդ հարցին: «Հիշո՞ւմ եք, երբ որ տեղական ինքնակառավարման մարմինների ընտրություններ էին լինելու ու բոլորը սպասում էին, որ մեր մարզում շատ լարված ընտրություններ են լինելու, ես ասացի` լինելու են մի քանի համայնքներ, որտեղ թեժ ընտրություններ են սպասվում, բայց լարվածություն առանձնապես չի լինելու, կգա ժամանակ, ամեն ինչ կընկնի իր հունի մեջ: Ճի՞շտ է, հիշո՞ւմ եք: Կարծում եմ այդ նույնը լինելու է նախագահական ընտրություններին, առանձնապես մեծ լարումների, սրացումների մի սպասեք, ամեն ինչ լավ է լինելու, և դա մեզ `բոլորիս է պետք, հատկապես Հայաստանի Հանրապետության ժողովրդին», -ասաց Աշոտ Գիզիրյանը:
Նունե ԱՐԵՎՇԱՏՅԱՆ
