Ավան եւ Նոր Նորք վարչական շրջանների ընդհանուր իրավասության դատարանում, Դավիթ Հարությունյանի նախագահությամբ, այսօր շարունակվեց «Հարսնաքար» ռեստորանային համալիրի աշխատակիցներ Գարիկ Մարգարյանի, Արթուր Բաբլոյանի, Արման Բաղդասարյանի, Նորայր Հայրապետյանի, Դավիթ Ադամյանի, Արման Խաչատրյանի դեմ հարուցված քրեական գործի դատաքննությունը:
Մինչ դատաքննության սկսվելը կողմերին բաժանվեցին նախորդ նիստում տուժողի իրավահաջորդի ներկայացուցիչների կողմից պատրաստված միջնորդությունները: Դատախազ Արթուր Դավթյանը կետ առ կետ տվեց իր դիրքորոշումը, մասնավորապես անդրադարձավ առգրավված իրերից ռեստորանային համալիրի համակարգչի պրոցեսորի ապահովության հարցը լուծելուն, իրեղեն ապացույց ճանաչելուն: Դատախազն ասաց, որ այս տարվա օգոստոսի 8-ին անջատվել է մաս՝ հանցագործության մյուս մասնակիցներին հայտնաբերելու ուղղությամբ: Այդ կապակցությամբ նրանք սպասում են պրոցեսորի հետ կապված եզրակացությանը: Նա նաեւ ասաց, որ առգրավված պրոցեսորը կնքվել է:
Կարդացեք նաև
Միջնորդություններից մեկը վերաբերում էր տեղանքի զննություն կատարելուն: Մեղադրողն ասաց, որ նախաքննության ընթացքում արվել է տեղազննություն, ընդ որում՝ մասնակցել է տուժողներից մեկը: Նա ասաց, որ եթե անհրաժեշտություն առաջանա տեղանքի զննության, ապա ինքը դեմ չի լինի, ավելին՝ այս միջնորդությունն առաջարկեց հետաձգել:
Տուժողի իրավահաջորդները միջնորդել էին նաեւ պարզել, թե արդյոք տեսաձայնագրման համակարգի արձանագրություն գոյություն ունի՞, թե՞ ոչ, պահանջել էին ընթերակաների տվյալները:
Ինչ վերաբերում է տուժող կողմի՝ «Հարսնաքարի» տեսախցիկների առկայությանը եւ տեղադրմանը, մեղադրողն ասաց, որ այստեղ էականը ոչ թե տեսախցիկների հեռավորությունն է, այլ արձանագրվածը:
Ինչ վերաբերում էր հաջորդ միջնորդությանը՝ առգրավել բոլոր պրոցեսորները (որպեսզի պարզվեր՝ դեպքի օրվա ֆայլեը պահպանվել են, թե ոչ), ապա մեղադրողն ասաց, որ Քրեական դատավարության օրենսգրքում չկա նման դատավարական գործողություն, ասել է թե՝ առգրավելու:
Տուժողները նաեւ միջնորդել էին ստուգման ենթարկել հիշողության կրիչները, թե արդյոք ժամանակի փոփոխություն կատարվե՞լ է, թե՞ ոչ: Այդ միջնորդությունը հետաձգվեց:
Ըստ դատախազի՝ միջնորդության «հաջորդ խումբը» վերաբերում էր տուժողների հագուստները իրեղեն ապացույց ճանաչելուն: Պարզվեց, որ գործում առկա է միայն տուժող Արտակ Բայադյանի հագուստը, իսկ մյուսների հետ կապված մեղադրողն ասաց, որ դատաքննության ձեռք բերած արդյունքներից հետո միայն այն ձեռք կբերվի:
Պաշտպանական կողմը միջնորդել էր նաեւ կենսաբանական փորձաքննություն նշանակել, որպեսզի թե ամբաստանյալների եւ թե տուժողների հագուստների մանրաթելերով որոշվի, թե ով ում է ծեծել, ինչ գործողություններ են կատարվել: Այս կապակցությամբ մեղադրողն ասաց, որ ամբաստանյալները գործել են միասնական դիտավորությամբ եւ որ էական նշանակություն չի կարող ունենալ նման փորձաքննությունը:
Ի դեպ, տուժողները միջնորդել էին անգամ, որպեսզի Հայաստանի ֆուտբոլի ֆեդերացիայի նախագահը «կամավոր» ներկայացնի իր հեռախոսահամարները, դրանց վերծանումները, ֆուտբոլի ակադեմիայի անձնակազմի վերաբերյալ բոլոր փաստաթղթերը, ամբաստանյալների իրական աշխատանքի վայրը, նրանց վերաբերյալ բոլոր փաստաթղթերը: Սակայն մեղադրողը առարկեց այդ միջնորդությունների դեմ, ասելով, թե դրանք որեւէ էական նշանակություն չեն կարող ունենալ ամբաստանյալներին առաջադրված հանցագործության իրավական գնահատականների հետ: Ամբաստանյալների պաշտպանները, որպեսզի դիրքորոշումներ արտահայտեն, խնդրել են ընդմիջում:
Տուժողի իրավահաջորդ փաստաբան Վահե Գրիգորյանը գտնում էր, որ ամբաստանյալների պաշտպանների կողմից ձգձգելու միտում կա, ավելին՝ հարցրեց. «Ի՞նչ համակարգված դիրքորոշում պետք է հայտնել, երբ կա 6 ամբաստանյալ»: Իհարկե, սրան առարկեց ամբաստանյալ Նորայր Հայրապետյանի պաշտպանը՝ Երեմ Սարգսյանը, հակադարձելով, որ տուժող կողմն է «համակարգված» բառն օգտագործել եւ որ կոռեկտ չէ իրենց նկատմամբ նման կարծիք հայտնելը:
Այսօր դատարան չեն ներկայացել տուժողներ Արտակ Բայադյանը, Գարիկ Սողոմոնյանը, Արկադի Աղաջանյանը, Էդգար Նիկոյանը եւ տուժողի իրավահաջորդ Գառնիկ Ավետյանը:
Դատական նիստը հետաձգվել է:
Ռուզան ՄԻՆԱՍՅԱՆ
