Եթե հիվանդ եք, մնացե’ք տանը, խուսափե’ք հիվանդների հետ շփումներից,
եթե հիվանդ եք, հրավիրեք տեղամասային մանկաբույժին, թերապեւտին կամ ընտանեկան բժշկին, մի’ զբաղվեք ինքնաբուժմամբ, հագնվե’ք եղանակին համապատասխան, օգտագործե’ք հնարավորինս շատ հեղուկ, հաճախակի օդափոխե’ք փակ տարածքները: Գրիպի սեզոնով պայմանավորված այսպիսի խորհորդներ է տալիս առողջապահության նախարարությունը: «Ներկայումս մեր հանրապետությունում, գրիպի եւ սուր շնչառական վարակների առումով համաճարակային իրավիճակը լարված չէ»,- վստահեցնում է նախարարությունը` վկայակոչելով Առողջապահության համաշխարհային կազմակերպության (ԱՀԿ) տվյալները: ԱՀԿ-ի տեղեկացմամբ, եվրոպական տարածաշրջանի երկրներում այսօր շրջանառվում են գրիպի Ա եւ Բ տեսակները: Ինչ վերաբերում է մեր հանրապետությունում գրիպի և սուր շնչառական վարակների համաճարակային իրավիճակին, ապա, ըստ ԱՆ-ի, իրավիճակը համեմատաբար հանգիստ է. «Իրավիճակի գնահատման համար հանրապետությունում իրականացվում է շաբաթական մոնիտորինգ: Հանրապետությունում շարունակվում են կատարվել գրիպի նկատմամբ լաբորատոր, վիրուսաբանական հետազոտությունները: Իրականացված հետազոտությունների արդյունքում գրիպի հարուցիչներ չեն հայտնաբերվել»:
«Առավոտ»
