ԱԺ մարդու իրավունքների պաշտպանության հանրային հարցերի մշտական հանձնաժողովը Եվրաինտեգրման հարցերի մշտական հանձնաժողովի հետ համատեղ դեռ սեպտեմբերին որոշել էր այցելել քրեակատարողական հիմնարկներ, ծանոթանալ պայմաններին, որպեսզի հնարավորինս համապարփակ ինֆորմացիա հավաքեր նոյեմբերի 20-ին հրավիրվելիք խորհրդարանական լսումների համար: Այսօր այդ շրջանակներում նշված երկու հանձնաժողովների անդամներն այցելեցին «Նուբարաշեն» քրեակատարողական հիմնարկ: Aravot.am-ի հետ զրույցում ԲՀԿ խմբակցության քարտուղար Նաիրա Զոհրաբյանը տեղեկացրեց հանդիպման արդյունքում գրանցված խնդիրների և անելիքների մասին: Տիկին Զոհրաբյանի փոխանցմամբ՝ իրենք նախ այցելել են ՀԱԿ ակտիվիստ Տիգրան Առաքելյանին: Նրա դատավճռի կապակցությամբ Ն. Զոհրաբյանն ասաց. «Դատավճիռը Տիգրան Առաքելյանի մասով համարում եմ ոչ արդար: Ուզում եմ ակնկալել, որ Վերաքննիչ դատարանը, որը վաղը քննելու է այդ հարցը, արդար որոշում կկայացնի, չնայած առանձնապես լավատես չեմ այդ հարցում»:
Վերջին շրջանում «Նուբարաշեն» քրեակատարողական հիմնարկում տեղի ունեցան մի շարք բողոքի ակցիաներ. դատապարտյալներից մեկը ճկույթն էր կտրել, կոպերն ու շրթունքները կարել, հացադուլ հայտարարել: Նրանց ևս հանդիպել են ԱԺ հանձնաժողովների անդամները, լսել նրանց խնդիրները: Այս առիթով Ն. Զոհրաբյանն ասաց. «Հիմնական բողոքները դատավարության ոչ արդար լինելու հետ են կապված, ինչը նշված երկու հանձնաժողովների խնդիրը չէ: Մեր խնդիրն է պարզել, թե ինչ պայմաններում են պահվում նրանք, ինչ բողոքներ ունեն: Եթե իրապես խնդրահարույց վճիռներ կան, նաև դրանք կբարձրացնենք պատկան մարմինների առաջ»: ԱԺ հանձնաժողովականները պետք է այցելեին նաև, այսպես կոչված, փուչիկների գործով մեղադրյալ Սերոբ Բոզոյանին: Սակայն ինչպես տեղեկացրեց Ն. Զոհրաբյանը, նա կալանքի մեջ չէ, քանի որ նրա գործը գտնվում է Վճռաբեկ դատարանում՝ երկրորդ դատական ատյանի վարույթում: Բայց նրա դեմ կայացված վճռի մասին Ն. Զոհրաբյանն ասաց. «Գործը մեր ուշադրության կենտրոնում է: Զուտ մարդկայնորեն և բարոյական հաթության մեջ դիտարկելով՝ կարծում եմ, որ վճիռը, որ հրապարակվել է Սերոբ Բոզոյանի նկատմամբ, պիտի վերանայվի: Մարդը քաղցկեղով հիվանդ է, խնամքի տակ ունի անչափահաս երեխաներ: Եվ ընդհանրապես պետք է պարզվի նրա իրական պատասխանատվության չափը: Ըստ Ն. Զոհրաբյանի՝ լրջագույն խնդիրը շարունակում է մնալ խցերի գերբեռնվածության, գերբնակության հարցը, ինչին միջազգային կառույցներն իրենց զեկույցներում ևս անդրադարձել են: Ն. Զոհրաբյանը բարձրաձայնեց նաև մեկ կարևոր խնդրի մասին. «Ինչո՞ւ հնարավոր չէ մի սենյակ հատկացնել քրեակատարողական հիմնարկում, որտեղ skype-ի միջոցով մարդը կսպառի իրեն հատկացված կարճաժամկետ տեսակցության րոպեները: Մենք պնդելու ենք, որ օրենքով դա ընդունվի»:
Տաթև ՀԱՐՈՒԹՅՈՒՆՅԱՆ
