Այսօր Մատենադարանի նորակառույց մասնաշենքի դահլիճում տեղի ունեցան Նոբելյան մրցանակակիրներ Թիմ Հանթի եւ Մարտին Չալֆիի հանրային դասախոսությունները` «Երիտասարդ կենսաբանների ասոցացիա» հ/կ-ի «Գիտություն առաջին ձեռքից» դասախոսությունների շարքի շրջանակում: Ծրագրի համակարգող Հովակիմ Զաքարյանը լրագրողների հետ զրույցում ասաց, որ դասախոսությունները նեղ մասնագիտական չեն եւ հասանելի են բոլորին. «Դրանց նպատակն է` բարձրացնել երիտասարդների հետաքրքրությունը գիտության հանդեպ, իսկ Նոբելյան մրցանակակիրներն այն մարդիկ են, ովքեր իրապես կարող են դա անել: Կենսաբաններից բացի` դասախոսությունների շարքին մասնակցում են նաեւ բնագետներ, իրավաբաններ եւ պատմաբաններ, այսինքն` չկա մասնագիտական, անգամ` տարիքային սահմանափակում: Դասախոսություններին գրանցվել էր 170-ից ավելի մարդ»:
Զաքարյանը հայտնեց, որ 20:30-ին կայացավ նաեւ կլոր սեղան-քննարկում` «Ինչպես դառնալ հաջողակ գիտնական» թեմայով, որին մասնակցում էին կենսաբանները. «Անմիջական շփման եւ հարցերի միջոցով երիտասարդները հնարավորություն ունեցան հետաքրքիր գիտելիքներ եւ խորհուրդներ ստանալ Նոբելյան մրցանակակիրներից»:
Ծրագրի համակարգողը նաեւ նշեց, որ դասախոսությունների կազմակերպմանն օժանդակել են Հայաստանի երիտասարդական հիմնադրամը, ԿԳՆ Գիտության պետական կոմիտեն, «Թուֆենկյան» բարեգործական հիմնադրամը եւ Մատենադարանը:
Լուիզա ՍՈՒՔԻԱՍՅԱՆ
