Քաղաքագետ Արմեն Աղայանի համոզմամբ, Արցախը փաստացի Հայաստանի մաս է, եւ դա ընդունում են թե՛ Միացյալ նահանգները, թե՛ Ֆրանսիան, թե ՛Ռուսաստանը:
«Եթե ինչ-որ մեկն էլ վիճարկում է, ապա զուտ տարածքային վեճի շրջանակներում»,- այսօր ասուլիսի ժամանակ կարծիք հայտնեց քաղաքագետը:
Ըստ նրա, ղարաբաղյան կոնֆլիկտի լուծման եւ Հայաստանի հետագա զարգացման համար վտանգավոր է եվրոինտեգրման ճանապարհը. «Եթե ընտրում ենք մի ռազմավարություն, որը ենթադրում է եվրոինտեգրացիան, լիբերալ-դեմոկրատական ինչ-որ կարգ, ապա այս ամբողջ համատեքստում մեր հավակնություններից պետք է հրաժարվենք: Այդ թվում նաեւ Արցախից պետք է հրաժարվենք, որովհետեւ ցանկացած միջազգային ինտեգրացիա սկսում է նեղ տարածաշրջանային ինտեգրացիայից: Այլ կերպ ասած, հստակ զիջումներ պետք է կատարենք: Այսօր, Արցախը անկախ հռչակելով եւ ընդունելով միջազգային տերմինաբանությունը, տարածքներ ենք կորցնում: Այս քաղաքական ուղիով գնում ենք տարածքներ հանձնելուն»:
Պարոն Աղայանը շեշտեց, որ ղարաբաղյան կոնֆլիկտի բանակցային գործընթացում Արցախին ոչ ոք բանակցային կողմ չի ընկալելու. «Ոչ ոք չի կարող բանակցել մի պետության հետ, որը լիարժեք պետության հայտանիշ չունի»:
Կարդացեք նաև
Արփինե ՍԻՄՈՆՅԱՆ
