Այսօր «Երկու երես» ակումբում քաղաքագետ Հրանտ Մելիք-Շահնազարյանը, անդրադառնալով համանախագահների այցին ու դրա արդյունքում տեղի ունեցած իրադարձություններին, նշեց. «Արցախում Բակո Սահակյանը որոշ հարցեր ներկայացրեց համանախագահներին, մասնավորապես՝ ադրբեջանցիներին կոնստրուկտիվ քննարկումների սեղան վերադարձնելն էր, եւ պրովոկացիոն գործունեությունից զերծ պահելը, ինչի կապակցությամբ որեւէ մեկնաբանություն, կամ հստակ պատասխան, ինչպես եւ կարելի էր սպասել, համանախագահների կողմից չհնչեց: Նրանք միայն ասացին, որ իրենց դիտարկումներն են ներկայացրել Արցախի իշխանություններին՝ կապված հետագա հնարավոր զարգացումների հետ»:
Հրանտ Մելիք-Շահնազարյանի կարծիքով՝ նմանատիպ անարդյունք հանդիպում տեղի ունեցավ նաեւ Երեւանում եւ Բաքվում: Ըստ նրա՝ միակ գլխավոր ձեռքբերումը եղավ այն, որ պայմանավորվածություն ձեռք բերվեց բանակցային գործընթացները շարունակել արտգործնախարարների մակարդակով, այսինքն՝ նախագահների հանդիպում կազմակերպել միջնորդներին այդպես էլ չհաջողվեց:
Քաղաքագետի կարծիքով, Մինսկի խմբի համանախագահները իրենց գլխավոր խնդիրը՝ պատերազմի վերսկսումը թույլ չտալը, կարողանում են լուծել:
«Միջազգային հարթակներում փոփոխություններ են տեղի ունենում, օրինակ երեկ Միացյալ ազգերի կազմակերպությունը բարձրացրել է Պաղեստինի կարգավիճակի հարցը՝ այդ կազմակերպության մեջ, նա արդեն դիտորդ անդամ է, ինչը իհարկե, ճանաչման առաջին փուլն է: Այն ինչ ակնկալում էին Պաղեստինի իշխանությունները՝ ստացան: Ի դեպ Պաղեստինի կարգավիճակը բարձրացնելու օգտին է քվեարկել նաեւ Ադրբեջանը, իսկ սա նախադեպ է Լեռնային Ղարաբաղի համար»,- հավելեց Հրանտ Մելիք-Շահնազարյանը:
Կարդացեք նաև
Եվա ՀԱԿՈԲՅԱՆ
