Թիվ 35 ընտրատարածքում Գյումրու քաղաքապետ Սամվել Բալասանյանի պատգամավորական տեղի համար պայքարող ՀԱԿ թեկնածու Մուրադ Գրիգորյանը, ով երեկ պարտվեց ՀՀԿ-ական մրցակցին` «Շիրակ» ֆուտբոլային ակումբի սեփականատեր Արման Սահակյանին, այսօր Aravot.am-ի զրույցում ասաց, որ իր նախընտրական շտաբը արձանագրած ընտրախախտումների շուրջ հարկ չի համարել գրավոր բողոք ներկայացնել ընտրատարածքային ընտրական հանձնաժողովին ու ոստիկանությանը:
«Ասեմ, թե ինչու գրավոր դիմում չենք ներկայացրել, երբ որ քվեարկության օրը ահազանգեցինք թանաքների օքսիդացման վերաբերյալ ընտրատարածքային հանձնաժողովին, պատասխանը բավականին շշմեցուցիչ էր: Փոխանակ իրենց մոտ ֆիքսելու, ընտրատեղամասերը ստուգելու, ճշտելու, նոր պատասխանելու. եթե հարցը ենթակա էր կարգավորման տեղում կարգավորեին, եթե ոչ , նորից ինձ պատասխանեին, մեզ միանգամից պատասխանեցին, որ ՀԱԿ շտաբից ահազանգողները հնարավոր է ենթարկվեն պատասխանատվության` պետական բյուջեին վնաս հասցնելու մեղադրանքով: Սկզբից չհասկացա, հետո երբ որ շարունակեցին պատասխանը, իրոք ապշեցնող էր: Պետական բյուջեն գումար է ծախսել, թանաք է առել, կամ թանաք է պատրաստել, իսկ ահազանգող վստահված անձը, ըստ հանձնաժողովի, պետական բյուջեին վնաս է հասցնում: Իրոք անեկդոտի է նման, այսքանից հետո դուք նման ինստանցիայի կվստահեի՞ք, որ ասենք փոխեին ձեր մեքենայի ծակած պակռիշկեն, իհարկե `ոչ, ես չէի վստահի: Էլ ո՞նց կարելի է վստահել ընտրական գործընթացի հետ կապված որևէ դիտարկում, բողոք», -հեգնեց նախկին թեկնածուն:
ՀԱԿ գրասենյակը ընտրախախտումների վերաբերյալ չի ահազանգել նաև ոստիկանությանը: «Ես չէի ուզենա, որ մեր համաքաղաքացիներից որևէ մեկը քավության նոխազ դառնար, մեկին փորձեն ցուցադրական պատժեն, ասենք միամտություն է ունեցել, մեկ անգամ քվեարկել է , անձնագրում կա դրոշմակնիք, բայց փորձ է արել երկրորդ անգամ քվեարկել: Չէի ուզենա, թեկուզ այսպիսի հիմքով մեր համաքաղացիներին ենթարկեին քրեական պատասխանատվության, այլ կուզենայի , որ պատասխանատվության ենթարկվեին հանձնարարություն տվողները, սցենար մշակողները, էդ հղփացած, լկտիացած, քաղաքում երթևեկություն խանգարող, երթևեկություն պարալիզացնող ջիփավորները , որոնք եկել էին այստեղ, որպեսզի մեր տեղի խեղճ, կամակատար, անողնաշար , ողորմելի չինովնիկներին , վարչության պետերին, գործադիր իշխանությունների ներկայացուցիչներին չակերտավոր ասած աշխատացնելու, ապահովելու իրենց կապրիզի հաղթանակը, ու սրանք անմեղսունակ էին: Նման անմեղսունակի կարգավիճակով, հլու-հնազանդ հարճի հեզությամբ կատարում էին իրենց պարտականութունը` խեղճ տատիկ-պապիկներին զոռով ընտրատեղամաս բերելու», -ասաց Գյումրու ՀԱԿ համակարգողը:
Նունե ԱՐԵՎՇԱՏՅԱՆ
Կարդացեք նաև
