«Ես, որպես մեկնարկային փաստաթուղթ, ընդունում եմ ամբողջովին այս յոթ կետերը։ Իհարկե, ժամանակի ընթացքում այդ կետերը պետք է բացվեն, և նախագահի յուրաքանչյուր թեկնածու, և որ կարևորն է, վարչապետի յուրաքանչյուր թեկնածու պետք է բացի այս յոթ կետերը»,- այսօր ՀՅԴ-ի կազմակերպած համաժողովի ժամանակ հայտարարեց «Ժառանգություն» կուսակցության առաջնորդ Րաֆֆի Հովհաննիսյանը:
Հիշեցնենք, որ ՀՅԴ-ն այսօր նախագահական ընտրությունների հանրային պլատֆորմի հասարակական քննարկում էր կազմակերպել: Իբրեւ պլատֆորմի հիմք նշվում են ՀՅԴ-ի նախապես հրապարակած յոթ կետերը, որոնք արդեն իսկ խորհրդարանական ուժերի հետ կոնսուլտացիաների փուլ են անցել:
«Դե յուրե, ազգային պետություն ունենալու ճանապարհին, դաշնակցության այս նախաձեռնությունը, քաղաքացիական օրակարգ սահմանելու հրամայականը համարում եմ բեկումային և խոստումնալից»,- հավելեց «Ժառանգության» առաջնորդը: Րաֆֆի Հովհաննիսյանը կարծում է, որ մենք կարող ենք «ի հեճուկս մեզ՝ քսան տարվա ընթացքում վերջապես ունենալ մի պետություն, որը պատկանում է յուրաքանչյուրիս»:
Նելլի ԳՐԻԳՈՐՅԱՆ
