«Խելոք, համառություն, նպատակ ունեցող մարդիկ ենք, եւ ոչ ոք չի կարող մեզ այդ նպատակից շեղել. Բանտերով չեն կարող, կեղծիքներով չեն կարող վախեցնել»,- այսօր գլխավոր դատախազության ամենշաբաթյա ՀԱԿ ակտիվիստների պիկետի ժամանակ ասաց ՀԱԿ խմբակցության պատգամավոր Արամ Մանուկյանը:
Անդրադառնալով դեկտեմբերի 2-ին ԱԺ լրացուցիչ ընտրություններին՝ պարոն Մանուկյանն ասաց, որ իշխանություններն իրենց ուզածն արեցին Ավանում. «Անուն, կենսագրություն, ոչինչ չունեցող մի հոգի էլ մտավ Ազգային ժողով, հետո՞»:
Պարոն Մանուկյանը հավաքվածների հետ նաեւ կիսվեց ԱԺ-ում ունեցած իրենց հաջողություններով. «Մեր գործը հաջող առաջ է գնում: Վերջին երկու շաբաթվա ընթացքում միայն հաջողություն ենք արձանագրել: 100 տոկոսով կողմ են քվեարկում այն նախագծերին, որ առաջ ենք տալիս: Վերջին մեկ ամսվա ընթացքում 4 խմբակցությունները՝ ԲՀԿ-ն, ՀՅԴ-ն, «Ժառանգությունն» ու ՀԱԿ-ը միայն նույն թիրախին են խփել: Մարտի մեկի հանձնաժողովի, մենաշնորհների դեմ պայքարի օրենքի հետ կապված եւ այլն»:
Կարդացեք նաև
ՀԱԿ պատգամավորը նաեւ դրական քայլ համարեց իրենց ներկայացրած մենաշնորհի դեմ պայքարի նախագծին հանրապետական երկու պատգամավորների քվեարկությունը. «Ես միշտ ասում էի, որ մեզ միանալու են հանրապետականները: Այդ թիվը կշատանա: Եթե 6 ձայն էլ կարողանանք ավելացնել, իսկ մենք այդ գործընթացի վրա ենք, իշխանությունը լրջագույն խնդիր կունենա: Էլ չեմ ասում ՝ իշխանությունները հոգեբանական ինչ բարդույթ ունեն: Ստիպում են իրենց պատգամավորներին պատրաստված հարց տալ, հետո պատրաստված պատասխան են տալիս , ստիպում են պատգամավորներին իրավունք կարդալ»:
Իսկ վերջում պարոն Մանուկյանը նաեւ հավելեց. «Ոչ դատախազի, ոչ նախարարների, ոչ միլպետի, որևէ մեկի մտքով չանցնի, թե մենք երբևէ մի քայլ հետ ենք կանգնելու, պառլամենտը՝ պառլամենտ, ինչ ուզում է լինի, բայց ժողովուրդը փողոցում է ուժեղ, մենք ձեզնով ենք ուժեք, մեր պայքարը մենակ էստեղ է, մենակ հրապարակներում է»,- հետո էլ կոչ արեց բոլորին իրենց երեխաներով մասնակցել դեկտեմբերի տասին նախատեսված ՀԱԿ-ի երթին:
ՀԱԿ խմբակցության ղեկավար Լեւոն Զուրաբյանն էլ հավաքվածներին հորդորեց, անկախ քաղաքական գործընթացներից, միշտ հիշել ՀԱԿ երիտասարդներին. «Որովհետեւ նրանք գնում են այդ կռվին, որ մեր ժողովուրդն ազատվի մենաշնորհներից: Նորից գոչենք ազատություն մեր քաղբանտարկյալներին»:
Արփինե ՍԻՄՈՆՅԱՆ
