Այսօր «Անի Պլազա» հյուրանոցի «Գառնի» սրահում ՀՀ կրթության և գիտության նախարարության հատուկ հանրակրթական ուսումնական հաստատություններում մշտադիտարկում իրականացնող հասարակական դիտորդների խումբը ներկայացրեց կատարված աշխատանքների հաշվետվությունը:
ԿԳ նախարար Արմեն Աշոտյանը հայտնեց, որ հանդիպման ընթացքում քննարկվելու են այս տարվա զեկույցը եւ մշտադիտարկման արդյունքները. «Դրանք ներկայացված են շատ մանրամասն եւ հիմնված են ինչպես ուսումնասիրությունների, այնպես էլ` շահառուների կարծիքների վրա: Նախարարությանն ուղղված է 15 առաջարկություն` պայմանների բարելավումից մինչ երեխաների իրավունքների պաշտպանության խնդիրը: Քննարկմանը հրավիրված են հ/կ-ներ, միջազգային կառույցներ, հատուկ դպրոցների տնօրեններ եւ նախարարության համապատասխան մասնագետներ, որպեսզի վերլուծենք ընթացիկ տարվա հաշվետվությունը, հասկանանք առաջարկությունների ողջ փաթեթը եւ հաջորդ տարի սկսենք կյանքի կոչել առաջարկությունների հնարավոր մասը»:
Նախարարի փաստմամբ. «Տարիներ առաջ հատուկ հանրակրթական դպրոցների վերաբերյալ հ/կ-ները եւ լրատվամիջոցներն ահազանգեցին, եւ մի շարք աղմկահարույց գործեր եղան: Մենք ընկանք դատական գործերի մեջ, որովհետեւ նախարարությունն անմիջապես արձագանքեց ահազանգերին եւ հետաքննության արդյունքում աշխատանքից ազատեց մի շարք տնօրենների: Այդ որոշումներն ամրապնդվեցին նաեւ դատական պրոցեսում: Այդ տարի իմ նախաձեռնությամբ ստեղծվեց հասարակական կազմակերպությունների մշտադիտարկման խումբ, որում ներառված հասարակական եւ միջազգային կազմակերպություններն ունեն տվյալ ոլորտում համապատասխան փորձառություն եւ ինքնակառավարման հսկայական հնարավորություններ: Նրանց տրվեցին բոլոր միջոցները` հատուկ դպրոցներում մշտադիտարկումներ իրականացնելու համար: Ուրախ եմ, որ տարիների ընթացքում մեր համագործակցությունը ստացվել է: Այսօր խումբը կայացել է, դրա աշխատանքին նախարարությունը չի միջամտում»:
Արմեն Աշոտյանի խոսքով. «Երեխաների իրավունքների պաշտպանության խնդիրը հատկապես ցավոտ է հատուկ դպրոցներում, որոնցում երեխաներն անց են կացնում իրենց օրվա գրեթե մեծ մասը: Հատուկ դպրոցներն ի սկզբանե վտանգավոր են այն տեսանկյունից, որ երկար տարիներ փակ են եղել հասարակության առջեւ: Մշտադիտարկման խումբը ճեղքել է այդ պատնեշները: Այսօր երեխաների մի մասը ճակատագրի բերումով է հայտնվել հատուկ դպրոցներում եւ չունի այս կամ այն հիվանդությունը, բայց ծնողները սոցիալական որոշ խնդիրների պատճառով նրանց տեղավորել են հատուկ դպրոցներում, որպեսզի պետությունը հոգա նրանց ոչ միայն կրթության, այլեւ սոցիական կարիքը»:
Կարդացեք նաև
Լուիզա ՍՈՒՔԻԱՍՅԱՆ
