«Գոշավանք» վանական համալիր պատմաճարտարապետական արգելոցի վարիչ Բակուր Հովսեփյանի վկայությամբ՝ 2011թ. Երեւանում կայացած աշխարհի հայ իրավաբանների համաժողովի մասնակիցները եւ հայաստանցի իրավաբանները ՀՀ սահմանադրական դատարանի նախագահ Գագիկ Հարությունյանի նախաձեռնությամբ Մխիթար Գոշի մատուռի (այնտեղ է գտնվում անվանի օրենսդիրի եւ առակագրի գերեզմանը) վերականգնման նպատակով հանգանակել են 140 միլիոն դրամ:
Մշակույթի նախարարարությունն այդ գումարով սկսել է մատուռի վերականգնման աշխատանքները , սակայն շինարարական որոշ թերություների պատճառով դրանք հետաձգվել են: Մատուռի վերականգնման աշխատանքները կշարունակվեն գարնանը:
Բակուր Հովսեփյանի վկայությամբ՝ «Գոշավանք» վանական համալիրի դրությունն անմխիթար է: Վանական համալիրի շինություններ են լցվում անձրեւաջրեր, եկեղեցիների պատերից քարեր են թափվում, ոչ բարվոք վիճակում են վանական համալիրի մաս կազմող, 1241թ. կառուցված Սուրբ Գրիգոր Լուսավորիչ եկեղեցին , 1237-1294 թվականներին կառուցված գրատուն-զանգակատունը, սեղանատունը:
Կարդացեք նաև
Դիլիջան քաղաքից սերված, Ուկրաինայում բնակվող գործարար Ջահան Մայիլյանը 4 տարի առաջ Գոշավանքին հարակից տարածքում գյուղի 5 բնակիչներից տարածքներ էր գնել, որպեսզի այդտեղ մշակութային կենտրոն հիմնի: Կառավարությունը գերակա շահ է ճանաչել այդ տարածքը, սակայն սեփականատեր Մայիլյանին հողատարածքի համար դեռեւս փոխհատուցում չի տվել:
Այդ տարածքում, վանական համալիրին կից մեծ փոսը լցրել են, որպեսզի նաեւ Գոշի վերին թաղամաս տանող ավտոճանապարհը գործի: Իսկ վանական համալիրի նորոգման խնդիրները տարիներով սպասում են իրենց լուծմանը:
Ոսկան ՍԱՐԳՍՅԱՆ
