Ամերիկայի քաղաքական մոնիտորինգի անկախ կենտրոնի նախագահ, ընտրական համակարգերի միջազգային փորձագիտական կենտրոնի (ICES) միջազգային դիտորդական պաշտոնական առաքելության անդամ Լիդիա Լոուսոնի գնահատմամբ, ՀՀ ընտրական օրենսգիրքը բոլոր տարրերն ունի ժողովրդավարական ընտրություններ անցկացնելու համար: «Օրենսգրքի վերջին տարբերակը համահունչ է ԵԱՀԿ-ի օրենսգրքի հետ՝ ժողովրդավարական, լավ ընտրություններ անցկացնելու համար: Ընտրությունները կլինեն թափանցիկ եւ կարտահայտեն ժողովրդի կամքը»,- այսօր ասուլիսի ժամանակ ասաց տիկին Լոուսոնը:
Նրա գնահատմամբ, Ընտրական օրենսգիրքը թույլ չի տալիս ընտրությունների ժամանակ իշխանություններին օգտագործել վարչական ռեսուրսները՝ համակարգելով ընտրական քարոզարշավի ժամկետները՝ արգելելով այն անցկացնել սահմանված ժամանակից շուտ, արգելում է նաեւ իշխանություններին՝ իրենց պաշտոնական դիրքը չարաշահելու ու լրատվամիջոցների եւ ուժային կառույցների հետ կոնտակտ ունենալու հնարավորությունը:
Տիկին Լոուսոնի միակ դիտողությունը մեր Ընտրական օրենսգրքի վերաբերյալ կապված էր բանտարկյալներին ընտրություններին մասնակցելու հնարավորությունից զրկելու հետ. «Սա բացասական փաստ է, որովհետեւ այն խախտում է բանտարկյալների իրավունքները եւ դեմ է մարդու իրավունքներին: Օրենսգրքում էլ գրված չէ, թե ինչի հիման վրա են նրանց արգելում քվեարկությանը մասնակցել»:
Կարդացեք նաև
Նա նաեւ դրական գնահատեց, որ արտասահմանում բնակվող ՀՀ քաղաքացիները չեն կարող մասնակցել քվեարկությանը: Ըստ նրա, արտասահմանում բնակվող հայերը տեղյակ չեն ՝ ինչ է կատարվում Հայաստանում, իսկ անտեղյակությունը կբերեր սխալ քվեարկությունների:
Արփինե ՍԻՄՈՆՅԱՆ
Տեսանյութը՝ «Ա1+»-ի
