Այսօր առավոտյան, ժամը 11-ի սահմաններում, Երեւան-Մեղրի ավտոճանապարհի Վայոց Ձորի Սարալանջ գյուղի մոտակայքում, ձնաբքի պատճառով մեքենաներ էին արգելափակվել եւ անանցանելի էր դարձել դեպի Սյունիք տանող միջպետական ճանապարհը:
Սյունիք ուղեւորված վարորդների պատմելով` ճանապարհին հարյուրավոր մեքենաներ էին կուտակվել, ճանապարհը փակվել էր ձնաբքի հետեւանքով, տեսանելիությունը ցածր էր, իսկ ձյան առատ տեղումներն էլ շարունակվում էր: Որոշ վարորդներ էլ ճանապարհն այլեւս չեն շարունակել եւ կրկին վերադարձել են Երեւան:
Դժվարանցանելի էր նաեւ Երեւան-Մեղրի մայրուղու «Զանգեր» կոչվող հատվածը, որտեղ մոտ 5-6 մեքենա խցանման մեջ էր ընկել, սակայն կարճ ժամանակահատվածում ապահովվել էր նրանց տեղաշարժը:
«Սիսիան ճանշին» ՍՊԸ տնօրեն Հրաչիկ Գաբրիելյանի խոսքով` այս պահի դրությամբ ձյան տեղումները շարունակվում են, ճանապարհին առկա ձյան շերտը կազմում է 20-30 սմ, ամբողջ գիշեր տեխնիկան մաքրման եւ մշակման աշխատանքներ էր իրականացնում, այս պահին եւս միջպետական մայրուղու վրա աղ ու ավազով մշակման աշխատանքներ են տարվում, սակայն ձյունը պարբերաբար գալիս է եւ կատարած ամբողջ աշխատանքը զրոյի հավասարացնում: Պարբերաբար կրկնվող քամու, ինչպես նաեւ մառախուղի առկայությունը ժամանակ առ ժամանակ դժվարություններ են ստեղծում վարորդների համար: «Այս պահի դրությամբ Զանգերից դեպի Գորիս տանող ճանապարհը բաց է եւ երթեւեկելի, մեքենաների կուտակումներ չկան, բայց ձյունը դեռ շարունակում է տեղալ, իսկ մեր աշխատակիցները ներկա դրությամբ աղ ու ավազով մշակում են ճանապարհը», -«Առավոտ»-ին փոխանցեց Հրաչիկ Գաբրիելյանը:
Կարդացեք նաև
Երեկվանից սկսած ձյան տեղումները շարունակվում է մարզի ամբողջ տարածքում եւ վարորդներին խորհուրդ է տրվում երթեւեկել ձմեռային անվադողերով:
Մերի ՍՈՂՈՄՈՆՅԱՆ
