«Հայ-թուրքական սահմանի բացման դեպքում Սիրիան Հայաստանին բավականին մոտիկ կլինի, և հնարավոր կլինի առավոտյան Հալեպից դուրս գալ և երեկոյան մեքենայով հասնել Երևան»,-Aravot.am-ի հետ զրույցում այսպիսի կարծիք հայտնեց ԱՄՆ նախագահի կայքում հայ-թուրքական սահմանի բացման ստորագրահավաքի հեղինակ Դանիել Իոաննիսյանը: Նրա կարծիքով՝ հայ-թուրքական սահմանի բացումը կհեշտացնի սիրիահայերի՝ ցամաքային ճանապարհով Հայաստան գալը, քանի որ օդային ճանապարով սիրիահայերը ՀՀ հասնելու համար բազում դժվարությունների առաջ են կանգնում: Մեզ հետ զրույցում Դ. Իոաննիսյանը մանրամասնեց. «Այս պահին սիրիահայերի՝ Հայաստան հասնելու միակ ճանապարհը ցամաքային ճանապարհն է: Իսկ այն հեռու ու բարդ է: Օդային ճանապարհի առումով տոմսերի քանակը սահմանափակ է: Այժմ սիրիահայերը շատ դժվարություններ ունեն ցամաքային ճանապարհով Հայաստան հասնելիս, քանի որ ստիպված հաղթահարում են 2000 կմ ճանապարհ, մտնում են իրենց համար անծանոթ երկիր՝ Վրաստան: Այնտեղ լեռնային ճանապարհներ են, մեկ օրում դժվար է հասնել, մեկ կամ երկու գիշեր ստիպված են մնալ հյուրանոցներում: Սա համարյա անհնար է»:
Մեր դիտարկմանը, թե չե՞ն վախենում քննադատություններից, թե միայն սիրիահայերի տեղափոխման խնդրի լուծման համար այս պահին հայ-թուրքական սահմանի բացումը կարող է բացասական հետևանքներ ունենալ, Դ. Իոաննիսյանն այսպես արձագանքեց. «2009 թվականին, երբ ստորագրվեցին հայ-թուրքական արձանագրությունները, ես էլ էի բողոքողների թվին պատկանում, նույնիսկ մեկ անգամ էլ բերման եմ ենթարկվել: Այդ արձանագրությունների բովանդակությունը շատ ու շատ այլ բաներ են ենթադրում, որոնք բնականաբար չեն բխում Հայաստանի շահերից: Իսկ ԱՄՆ նախագահի կայքում իմ նախաձեռնած ստորագրահավաքի դեպքում գրված է, որ խոսքը վերաբերում է առանց նախապայմանների սահմանի բացման հարցին: Առանց նախապայմանների սահմանի բացումը չի ենթադրում ոչ ցեղասպանության հարց, ոչ պատմական հանձնաժողով, ոչ տարածքային ամբողջականության ընդունում- չընդունում, ընդամենը բացվում է սահմանը: Ստորագրահավաքը շարժվում է առաջ, երեկվա դրությամբ 500-ի շեմն ենք հաղթահարել: Ավելի կամաց է գնում, քան կցանկանայինք: Դա պայմանավորված է նրանով, որ պրոցեդուրան բավականին բարդ է»:
Թուրքագետ Արտակ Շաքարյանից էլ հետաքրքրվեցինք՝ արդյո՞ք այս պահին հայ-թուրքական սահմանի բացումը նպատակահարմար է: Նա պատասխանեց. «Սահմանի բացումն առանց նախապայմանների գտնում եմ նպատակահարմար: Կարևորը հարցը բարձրացնելն ու անընդհատ Թուրքիային անհանգստացնելը, հարցը օրակարգում պահելն է»:
Կարդացեք նաև
Տաթև ՀԱՐՈՒԹՅՈՒՆՅԱՆ
