ՀԱԿ անդամ, «Ժողովրդավարական հայրենիք» կուսակցությունը երեկ քաղխորհրդի նիստում Կոնգրեսին ճգնաժամից դուրս բերելու աշխատանքային փաստաթուղթ է կազմել: Կուսակցության նախագահ Պետրոս Մակեյանը Aravot.am-ին ասաց, որ քաղխորհրդի որոշմամբ այդ փաստաթուղթը մինչեւ Կոնգրեսում չքննարկեն՝ չեն հրապարակելու:
Կուսակցությունը բացի այդ փաստաթղթից որոշել է նաեւ առաջիկա ընտրություններին մասնակցելու ձեւաչափը: Այս մասին էլ պարոն Մակեյանը շատ չմանրամասնեց՝ բացատրելով, որ առաջիկա ժամերին հայտարարությամբ հանդես կգան:
«Հայտարարությունը իրավիճակի գնահատականն է: Այս պահի դրությամբ ընտրություններում իրավիճակի փոփոխության հնարավորության տեսական ելքն ենք մշակել»,- ասաց պարոն Մակեյանը:
Մեր հարցին՝ իրենց կուսակցությունը կսատարի՞ «Ազատություն» կուսակցության նախագահ Հրանտ Բագրատյանին, պարոն Մակեյանն ասաց. որ հարգում է ու նորմալ է վերաբերում նրա առաջադրմանը. «Հաշվի առնելով, որ «Ժողովրդավարական հայրենիք» եւ «Ազատություն» կուսակցությունները ՀԱԿ- ում համատեղ աշխատել ու աշխատում են, կուսակցության անդամներն ազատ են Բագրատյանին աջակցելու գործում, բայց դա չի ձեւակերպվել քաղաքական հայտարարությունում, որովհետեւ մեր կուսակցությունում գտնում են՝ երկրում ստեղծված իրավիճակը փոխելու համար պետք է ուժային կենտրոն ձեւավորել: Իհարկե հիմա բարդ է , բայց տեսական տարբերակ երեկվա քննարկման ժամանակ տեսնում էինք»:
Կարդացեք նաև
Հիշեցնենք, որ ՀԱԿ անդամ երկու կուսակցություններ արդեն իսկ արել են հայտարարություններ, որոնք հակասում են որեւէ թեկնածուի չպաշտպանելու ՀԱԿ որոշմանը: «Քրիստոնեա-ժողովրդական վերածնունդ» կուսակցությունը հայտարարել է, թե որոշել է 2013 թ. ՀՀ նախագահի ընտրություններում պաշտպանել «ՀԱԿ անդամ-գործընկեր «Ազատություն» կուսակցության նախագահ Հ.Բագրատյանի թեկնածությունը»: Իսկ «Մարդու իրավունքներ-96» կուսակցության վարչությունը ողջունել է «Ազատություն» կուսակցության համագումարի որոշումը «ՀԱԿ քաղխորհրդի անդամ Հ.Բագրատյանին ՀՀ Նախագահի թեկնածու առաջադրելու մասին»:
Արփինե ՍԻՄՈՆՅԱՆ
