Այսօր քաղաքագետ Արմեն Բադալյանը առաջիկա նախագահական ընտրությունները որակեց պետպատվերի շրջանակներում նախատեսված նկարչություն: Հիշեցնենք, քաղաքագետն ասել էր, որ գյուղապետերին ՀՀԿ-ն ցուցակներ է ներկայացնելու ու պահանջելու ընտրողների մասնակցությունն ու նախագահի երկրորդ թեկնածուին տված ձայները նկարել:
ԱԺ ՀՀԿ պատգամավոր Մանվել Բադեյանը վառ երեւակայության մշակած սցենար համարեց ընտրությունները նկարչություն կամ միջոցառում համարող քաղաքագետի գնահատականները: «Ընտրություններին ժողովրդի դերակատարությունը զրոյի հանգեցնելը մարդկանց վիրավորել է նշանակում, նման բան չկա, ոչ էլ պլանավորվում է, եւ չի էլ կարելի պլանավորել նույնիսկ մեծ ցանկության դեպքում»,- Aravot.am-ին ասաց պարոն Բադեյանը:
Նրա համոզմամբ, ընտրություններում լուրջ պայքար չի լինելու, որովհետեւ ՀՀԿ թեկնածուի դեմ որեւէ լուրջ թեկնածություն չկա:
Պարոն Բադեյանը, անդրադառնալով քաղաքագետ Բադալյանի պնդմանը, թե
Կարդացեք նաև
ընտրությունները դեռ չսկսված՝ արդեն ունենք էպոսագետին հաղթած նախագահ, ասաց. «Չեմ հասկանում՝ ինչ եք ասում, երեւի մի հիմար մի բան ասել է, չեմ մեկնաբանելու: Ի՞նչ անենք, նախագահը մտածի՝ իր դեմ ում դնի՞ մի հզոր թեկնածու, որ էպոսագետ չլինի՞, ո՞նց եք պատկերացնում»:
Հետո էլ ասաց, որ էպոսագետի նման թեկնածուները, որոնց մի մասն էլ մաղվեց, նախագահ դառնալու նպատակ չունեն. «Նրանք հետապնդում են իրենց ցույց տալու խնդիր, կարող է՝ ուզում են իրենց գլուխը զոքանչի մոտ գովել: Նրանք որեւէ կապ չունեն քաղաքական իրադարձություն անվանելու հետ, նրանք զավեշտի ոլորտից են»:
Պարոն Բադեյանը անդրադարձավ նաեւ Բաղրամյան 26-ի կողմից արդեն որոշված նախագահի 2-րդ թեկնածուի մասին քաղաքագետի պնդումներին: «Էդ ի՞նչ ա Բաղրամյան 26-ը: Իմ կարծիքով, նշանակություն չունի՝ ով կլինի 2-րդը, որովհետեւ 2-րդը ոչինչ է, ինչպես 3-րդն ու 4-րդը: Նախագահը մեկն է լինում: Որեւէ իմաստ չունի ընտրությունները կեղծելու, ապօրինություններ անելու, իմաստ չունի, որովհետեւ թեկնածուն ակնհայտորեն մեծ առավելություն ունի»:
Պարոն Բադեյանը նաեւ ընդդիմությանը մեղադրեց ոչ մրցակցային ընտրությունների համար. «Եթե ընդդիմությունը կազմակերպված չէ, իր խնդիրն է: Թող լինեին ավելի կազմակերպված, ունենային ավելի մեծ աջակցություն հասարակության կողմից, եւ այդ դեպքում ընտրությունները միգուցե կլինեին ավելի լարված ու ինտրիգ պարունակող: Եթե հիմա այդպիսին չէ, դրա մեղավորը միայն ընդդիմությունն է ՝ որպես չկայացած, չկազմակերպված, հասարակությանը գաղափարախոսություն չներկայացրած մի հեղհեղուկ զանգված: Նրանց մեղքն է»:
Արփինե ՍԻՄՈՆՅԱՆ
