Րաֆֆի Հովհաննիսյանի քարոզարշավին կանայք բողոքում էին
«Արի՜, արի՜ ասեմ: Ամբողջ օրը 1000 դրամի չեմ ծախում, որ ապրենք»,-այսօր Բժշկական համալսարանի անցումի մոտ քարոզարշավի շրջանակներում Կենտրոնի բնակիչներին բարեւող Րաֆֆի Հովհաննիսյանին այսպես դիմեց մի կին:
Կինն իր պատրաստած աղաբլիթները փաթեթավորել էր ու բերել էր չամուսնացածների համար վաճառքի:
Րաֆֆի Հովհաննիսյանը կնոջը վստահեցրեց, որ «հենց մեր պատգամավորները ձեր կողքին են այս հարցով»:
Կարդացեք նաև
Կինը բողոքեց. «Հարամ ըլնի սենց ապրելը, աղի բլիթ եմ ծախում, որ ապրեմ»: Մեր հարցին, թե ո՞ւմ եք ընտրելու, որոշե՞լ եք արդեն՝ կինը պատասխանեց. «Ոչ մեկին էլ չեմ ընտրելու: Ում էլ ընտրում եմ, իրա գրպանի համար ա աշխատում: Ոչ մեկին էլ չեմ ընտրելու: Ոչ էլ գնալու եմ ընտրության»: Մեր դիտարկմանը, որ ձեր ձայնը կարող է օգտագործվել՝ հօգուտ իշխանության, կինը հավաստիացրեց՝ «չեն կարա»:
«Պարոն Հովհաննիսյան, 74 տարեկան կին եմ, եկել եմ էստեղ՝ շոր ու մոր եմ ծախեմ, հացի փող անեմ, ինչո՞ւ: Տղես 50 տարեկան ա, որտեղ գնում ա գործ ճարելու, ասում են՝ դու բիձա ես, քեզ աշխատանք չի հասնում: Եթե դուք նախագահ ընտրվեք, կարո՞ղ եք մեր կյանքը բարելավել»,- նախագահի թեկնածուին այսպիսի հարց ուղղեց Աշխեն տատը:
Րաֆֆի Հովհաննիսյանը պատասխանեց. «Ես քեզի պիտի ոչ թե իշխեմ, այլ ծառայեմ 5 տարի՝ առանց որեւէ բիզնեսի, առանց եկամուտի: Դուք ուզո՞ւմ եք մեկ անգամ երկիր փոխել: Եթե ուզում եք, այդ օրը գնացեք, թերթի վրա ինչ ուզում եք գրեք, բայց գնացեք»: Կինը երկար տարիներ աշխատել էր գործարանում. «Ես իմ թոշակը կառնեի, ոտերս փռած կապրեի»: Րաֆֆի Հովհաննիսյանը խոստացավ, որ 5 տարվա ընթացքում թոշակները 50%-ով բարձրացնելու է:
Հռիփսիմե ՋԵԲԵՋՅԱՆ
