Այսօր Երեւանի Վահան Թեքեյանի անվան թիվ 92 դպրոցում տոնական տրամադրություն էր: Այստեղ մեկնարկել էր արեւմտահայ մեծանուն բանաստեղծ Վահան Թեքեյանի անվան մրցույթ- փառատոնի երկրորդ փուլը, որի շրջանակներում դպրոցում հավաքվել էին Վահան Թեքեյանի անունը կրող Գյումրիի, Ստեփանավանի, Բերձորի (Արցախ), Արագածոտնի, Երեւանի և Կիլիկյան վարժարանի սաները: Մրցույթ-փառատոնի առաջին փուլը մեկնարկել է դեռ հունվարի 21-ին` բանաստեղծի ծննդյան օրը: Միջոցառման ժյուրիի կազմում էին վաստակավոր արտիստուհի Էլվինա Շահինյանը, Գ. Սունդուկյանի անվան ազգային ակադեմիական թատրոնի դերասանուհի Ջուլիետա Բաբայանը, ժողովրդական արտիստ Գույժ Մանուկյանը, ՀՀ Կրթության եւ Գիտության նախարարության վարչության պետ Նարինե Հովհաննիսյանը,Վ. Թեքեյան կենտրոնի հիմնադիր Արմեն Ծուռիկյանը, իսկ կազմի նախագահը ԵՊՀ հայ գրականության ամբիոնի վարիչ, դոկտոր- պրոֆեսոր Սամվել Մուրադյանն էր:
Ժյուրիի կազմի նախագահը ներկայացրեց բանաստեղծի կյանքի ուղին եւ կարեւորեց այսպիսի միջոցառման անցկացումը. « Սա իսկապես մեծ հաջողություն է, որովհետեւ հայրենիք- սփյուռք կապըեւ դրանց միջեւ կենդանի խորհրդակցությունը այլ կերպ չէինք էլ կարող երեւակայել »:
Իսկ Արցախի Վահան Թեքեյանի անվան միջնակարգ դպրոցի տնօրեն Անահիտ Քոսակյանը շեշտեց հատկապես այն փաստը, որ նման միջոցառումը կապող միջոց է Արցախի եւ Հայաստանի համար` նշելով,որ սա հատկապես կարեւոր է Արցախի եւ Կիլիկյան վարժարանի սաների համար:
Մրցույթ- փառատոնի մասին իր կարծիքը «Առավոտին» հայտնեց նաեւ դերասանուհի Էլվիրա Շահինյանը. «Արդեն հինգերորդ տարին է, որ անցկացվում է այսպիսի մրցույթ- փառատոն, եւ ամենագովելին այն է, որ այսօրվա դպրոցականները գիրք են կարդում, սիրում են գրականություն, արվեստ: Ես մեծ հաճույքով եմ մասնակցում այս փառատոնին` իբրեւ ժյուրիի անդամ: Ես զգում եմ այդ փոքրիկ երեխաների հուզմունքը բեմ բարձրանալուց առաջ, ինչ մեծ սեր ունեն նրանք հայոց լեզվի նկատմամբ: Դա շատ գովելի է»:
Կարդացեք նաև
Նշված վեց դպրոցներից մասնակիցների ընդհանուր թիվը վաթսուն է: Եւ շուրջ երեք ժամ տեւած ասմունքի մրցույթի այս փուլը հաջողությամբ հաղթահարեցին քսաներկու մասնակից` երկուսը Բերձորի, երեքական մասնակից Ստեփանավանի, Գյումրիի, Երեւանի դպրոցներից, հինգական սան Արագածոտնից ու Կիլիկյան վարժարանից:
Հաջորդ փուլը կլինի վերջինը` երեք մրցանակային տեղերով եւ տասնինը խրախուսական մրցանակներով:
Գոհար ՍԱՅԱԴՅԱՆ
