«Մեր պահանջը հետեւողական է լինելու , որ գործի բացահայտման ուղղությամբ կոնկրետ քայլեր իրականացվեն: Եթե այդքան արագ արդեն ձերբակալվածներ կան, հույս է ներշնչում, որ այս գործը լիարժեք բացահայտում կունենա»,- Aravot.am-ին ասաց Աժ ՀՅԴ-ական պատգամավոր Արծվիկ Մինասյանը՝ անդրադառնալով Պռոշյան համայնքի դաշնակցական գյուղապետ Հրաչ Մուրադյանի սպանության գործով նույն գյուղի բնակիչներ Արայիկ եւ Արտակ Պետրոսյանների ձերբակալությանը:
Պարոն Մինասյանից հետաքրքրվեցինք՝ սպանված գյուղապետի համագյուղացիների ձերբակալությունը որպես կասկածյալ չի՞ շեղում սպանությունը քաղաքական հողից դեպի կենցաղային հող: Հիշեցնենք, ՀՅԴ Գերագույն մարմնի ներկայացուցիչ Արմեն Ռուստամյանը «Ազատություն» ռադիոկայանի հետ զրույցում պնդել էր, որ սպանությունը քաղաքական ենթատեքստ ունի. « …փորձել ինչ-որ կենցաղային դաշտ տեղափոխել, նշանակում է շեղել քննությունը»:
Հիշեցնենք նաեւ, որ մամուլում որպես հիմնական կասկածյալ շրջանառվում էր ՀՀԿ-ական Արթուր Մուրադյանի անունը, ով Պռոշյանի գյուղապետի թեկնածու է եղել եւ լարված հարաբերությունների մեջ է եղել Պռոշյանի գյուղապետ Հրաչ Մուրադյանի հետ:
«Անհանդուրժողոկանության, անարդարության, անպատասխանատվության մթնոլորտի պայմաններում այդպիսի հանցագործությունները եւ այդպիսի տեսակի նկատմամբ կատարված հանցագործությունները գնդակ են արձակված պետականության նկատմամբ: Այդքանով քաղաքական հող ունի: Բայց կազմակերպիչների եւ այլնի տեսակետից հիմքեր չունենք պնդելու նման բան: Ինչ վերաբերում է գործի շեղումներին եւ այլն, այս պահին նման պնդումներ չեմ կարող անել: Գործը նախաքննության փուլում է, հիմա չեմ տա գնահատականներ, քննության ընթացքում, ըստ իրավիճակի, մեր գնահատականները կտանք»,-ասաց պարոն Մինասյանը:
Կարդացեք նաև
Պարոն Մինասյանը նաեւ ասաց, որ թեեւ գյուղապետի նկատմամբ մշտապես ճնշումներ են եղել, բայց այդ ճնշումները որպես սպանության հիմք ու պատճառ իրենք չեն ուզում համարել. «Հերոս անձնավորութունը ոստիկանություն հաղորդագրություն տար, որ իր նկատմամբ լարվածություն կա՞: Քանի նման հերոս կա, որ նման հայտարարություն կաներ: Իր նկատմամբ, իր շուրջ ստեղծվող լարվածությունն ակնհայտ էր՝ կար, մենք չենք ուզում մտածել, որ հատկապես դա է պատճառ հանդիսացել, բայց իր նկատմամբ, որպես համայնքի դաշնակցական ղեկավարի, միշտ եղել է լարվածություն եւ իշխանություններն անընդհատ փորձել են խոչընդոտել նրան ընտրություններում»:
Արփինե ՍԻՄՈՆՅԱՆ
