Այսօր Վանաձորի տարեցների տունը մարդաշատ էր:
Տան բնակիչներին իրենց ուշադրությունն էին եկել փոխանցելու Լոռու մարզի Ախթալայի, Մարգահովիտի եւ Դսեղի «Համայնքային երիտասարդական նախաձեռնությունների ակումբի» անդամները:
Նրանք երգեցին, պարեցին, բանաստեղծություններ ձոնեցին տարեցներին, ապա եւ իրենց պատրաստած ուտելիքներով հյուրասիրություն կազմակերպեցին:
Կամավորական ակցիան իրականացվում է «կամավորություն+Գործողություն= Փոփոխություն» ծրագրի շրջանակներում:
Կարդացեք նաև
«Ծրագիրն իրականացնում է Գյումրու «Երիտասարդական նախաձեռնւթյունների կենտրոն» ՀԿ-ն, Քաունթերփարթ ինթերնեշնլի Հայաստանյան ներկայացուցչության ԱՄՆ Միջազգային գործակալության աջակցությամբ: Լոռու մարզում կազմակերպիչը «ՀԿ Կենտրոն» ՔՀԶ ՀԿ-ն է, որն աշխատում է այդ համայնքներում»,-Aravot.am –ի հետ զրույցում տեղեկացրեց ծրագրի ղեկավար Նելլի Մինասյանը:
Նա հավելում է, որ ծրագիրը նպատակ ունի հասարակության մեջ բարձրացնել կամավորության արժեքը, մշակույթը:
«Չնայած նրան, որ կամավորությունը, կամավորական աշխատանքը Հայաստանում շատ ծեծված թեմա է, այնուամենայնիվ, այն կորցրել է իր արժեքը, մշակույթը, գաղափարախոսությունը: Այդ իսկ պատճառով փորձում ենք այս ծրագրի միջոցով խրախուսել կամավորական մշակույթը, բարձրացնել նրա արժեքը` ընդգրկելով տարբեր հասակի, տարեր շերտերի մարդկանց»:
Անուշ ԲՈՒԼՂԱԴԱՐՅԱՆ
