Վրաստանի մշակույթի նախարարությունը ընդունել է Իոսիֆ Ստալինի բրոնզե հսկա արձանը կրկին տեղադրելու Գորիի քաղաքապետարանի առաջարկը: Գրում է «Սիվիլ» լրատվականը:
Սակայն այս անգամ արձանը ոչ թե կդրվի բռնապետի հայրենի քաղաքի կենտրոնական հրապարակում, այլ Գորիի Ստալինի թանգարանում:
Ինը մետրանոց պատվանդանով վեց մետրանոց արձանը Գորիի կենտրոնական հրապարակից հանվել էր 2010թ. հունիսին, գիշերվա կեսին: Այդ ընթացքում Վրաստանի իշխանությունները, այդ թվում՝ նախագահ Միախյիլ Սահակաշվիլին, ասում էին, որ ծրագրվում է արձանը դնել թանգարանում, բայց այդպես էլ չէին իրականացրել այդ ծրագիրը:
Սահակաշվիլին վերատեղադրման որոշումը որակել է «բարբարոս, հակապետական, հակաազգային գործողություն» ու կոչ է արել վարչապետ Բիձինա Իվանիշվիլիին «վերանայել այս հիմար որոշումը»:
Կարդացեք նաև
Գորիի քաղաքապետարանից հայտնել են, որ տեղադրման օրը դեռ որոշված չէ:
Պատրաստեց Հովհաննես ԻՇԽԱՆՅԱՆԸ
