Նրա փաստաբանը պնդում է, որ սեքսուալ բռնի գործողություն տեղի չի ունեցել
Լոռու մարզի առաջին ատյանի դատարանը, դատավոր Սուրեն Բաղդասարյանի նախագահությամբ, իր հարեւանուհու նկատմամբ սեքսուալ բռնի գործողություններ կատարելու մեջ մեղադրվող 76-ամյա Բորիս Միխայլովին դատապարտել է ազատազրկման՝ երեք տարի ժամանակով եւ կիրառելով համաներման ակտը` նրան ազատել պատժի կրումից:
Բորիս Միխայլովին մեղադրանք է առաջադրվել այն բանի համար, որ նա 2009թ. հոկտեմբեր ամսին Ալավերդի քաղաքի իր բնակարանում իր հարեւանուհի Մ. Վ.-ի նկատմամբ կատարել է սեքսուալ բնույթի բռնի գործողություններ, որի արդյունքում 2010թ. հունիսի 23-ին Մ. Վ.-ն աղջիկ երեխա է ունեցել:
Համաձայն չլինելով կայացված դատավճռի հետ` տուժող կողմը վերաքննիչ բողոք էր ներկայացրել՝ խնդրելով բեկանել ՀՀ Լոռու մարզի ընդհանուր իրավասության դատարանի դատավճիռը, փոփոխել այն` ամբաստանյալ Բորիս Միխայլովի նկատմամբ պատիժ նշանակել 3 տարի վեց ամիս ժամանակով, հայցադիմումն ամբողջությամբ բավարարել և ամբաստանյալից բռնագանձել 1.031.000 ՀՀ դրամ գումար:
Կարդացեք նաև
Տուժող կողմը գտել է, որ առաջին ատյանի դատարանը, մեղավոր ճանաչելով Բորիս Միխայլովին իրեն մեղսագրվող արարքի կատարման մեջ, այսինքն՝ ապացուցված համարելով Ս. Վ.-ի նկատմամբ վերջինիս հայրության փաստը, միաժամանակ երեխայի գոյության մասին մոռանալով կամ դա ոչ բավարար համարելով` վերացականորեն համարել է, որ երեխայի ծնունդը, ծննդաբերության հետեւանքով Մ. Վ.-ի մոտ ծագած առողջական խնդիրները, իրենց ընտանիքի կողմից ծննդաբերության և երեխայի կարիքները հոգալու կապակցությամբ կատարված ծախսերը սեքսուալ բնույթի բռնի գործողություններ կատարելու և Մ. Վ.-ի հղիանալու հետ ընդհանրապես կապ չունեն, չգիտես որտեղից են ծագել, ինչի համար են կատարվել:
ՀՀ վերաքննիչ քրեական դատարանը, սակայն, դատավոր Եվա Դարբինյանի նախագահությամբ, մերժել էր բողոքաբերի պահանջը:
Բորիս Միխայլովի փաստաբան Ռոման Կոնինյանն էլ, թեեւ չի հերքում, որ իր պաշտպանյալն է ծնված աղջիկ երեխայի հայրը, գենետիկական փորձաքննությամբ դա հնարավոր է համարվել, այնուամենայիվ, նկատում է, որ սեքսուալ բռնություն տեղի չի ունեցել:
«Հարեւանուհին իր ոտքով գնացել է Բորիսի տուն, այդ ժամանակ Բորիսի կինն էլ է տանը եղել, եւ ըստ նրա տված ցուցմունքների`բռնության ձայներ չի լսել, ավելին, հարեւանուհին դեպքից մեկ ու կես տարի հետո է բողոքել, երբ գումար է պահանջել իմ պաշտպանյալից, նա չի տվել, այդ ժամանակ էլ բողոքել է, թե բռնություն է տեղի ունեցել, ավելին՝ բռնության ոչ մի հետք չի հայտնաբերվել»,-ասում է Ռոման Կոնինյանը` տեղեկացնելով, որ հարեւանները ընտանիքներով մտերիմ են եղել:
Նա հավելում է, որ պաշտպանական ճառով խնդրել էր արդարացման դատավճիռ կայացնել, քանի որ իր պաշտպանյալը մեղավոր չէ:
«Արդարացման լիարժեք հիմքեր կային, բայց քանի որ իմ պաշտպանյալը տեսավ, որ համաներմամբ պիտի ազատվի, էլ չուզեց բողոքարկել»,-եզրափակում է նա:
Անուշ ԲՈւԼՂԱԴԱՐՅԱՆ
Վանաձոր
«Առավոտ» օրաթերթ
