Օգոստոսի 18-ին news.am լրատվական կայքը նյութ էր հրապարակել սիրիահայ գործարար Շահեն Չերքեզյանի մասին: Պարոն Չերքեզյանը` Հոմս քաղաքի Solar Heaters արևային ջրատաքացուցիչների սեփականատերն է: Նա ցանկանում էր արևային ջրատաքացուցիչների բիզնեսը Հայաստան բերել: Բայց հաշվի առնելով Հայաստանի հարկային և մաքսային ծառայությունների աշխատանքը` հրաժարվել է:
Մեկ այլ սիրիահայ գործարար Ալեքսան Կարադանայանը, Երևանում հիմնել է տպարան և տեքստիլի դիզայնի կենտրոն: Aravot.am-ը զրուցել է պարոն Կարադանայանի հետ` իմանալու համար արդյոք վերջինս ինչ-որ խնդիրներ ունեցե՞լ է հարկային դաշտի հետ և առհասարակ ինչ դժվարությունների է հանդիպել Հայաստանում:
Ալեքսան Կարադանայանը պատմեց， որ սկզբում դժվար է եղել，քանի որ Սիրիայում հարկային համակարգը շատ է տարբերվում Հայաստանի հարկային համակարգից. «Մեզ համար խորթ էր այս ամենը: Մենք սովոր չէինք հարկեր վճարել: Սիրիայում, եթե նոր բիզնես ես հիմնում, պետությունը 5 տարի ազատում է հարկերից， որպեսզի կարողանաս աշխատողներ պահել: Սակայն պետք է ասեմ, որ մեզ մոտ գործարարների 99%-ը անօրինական են աշխատում: Պետությունը մեզ շատ չի ճնշում: Այստեղ այդպես չի: Հայաստանում ամեն ինչ օրենքով են անում: Այսինքն` հեշտ համակարգից մենք անցանք ավելի բարդ համակարգի: Սակայն օժանդակություն կա: ՀՀ սփյուռքի նախարարությունը մեզ համար անգամ հաշվապահական դասընթացներ կազմակերպեց， որպեսզի ավելի լավ ծանոթանանք հարկային դաշտին: Լավ է，ամիսը կամ երեք ամիսը մեկ անգամ 5% հարկ ենք վճարում»:
Պարոն Կարադանայանը， որը Հալեպից Հայաստան է եկել մեկ տարի առաջ，անդրադառնալով իր բիզնեսի հետ կապված դժվարություններին` նշեց. «Հայաստանում հագուստ արտադրողները քիչ են: Մարդիկ այլ երկրներից են բերում և այստեղ թանկ վաճառում: Մենք աշխատում ենք հագուստ արտադրողների հետ և որքան նրանք շատ լինեն， մեր գործն այդքան ավելի լավ կլինի: Այսինքն` մենք մեծ շուկայից եկանք նոսրացած շուկա»:
Կարդացեք նաև
Ինչ վերաբերում է բիզնեսի շահութաբեր լինելուն` Ալեքսան Կարադանայանը դեռ դժվարացավ որևէ գնահատականներ տալ， բայց նշեց， որ այստեղ գործը շատ քիչ է. «Ներկայումս գործերն այնքան էլ լավ չեն， բայց դա նորմալ է: Սիրիայում նույնպես սկզբում ծանոթություններ չունեինք，սակայն հետո մեզ ճանաչեցին և գործերը լավացան: Եթե համեմատեմ， ապա Սիրիայում մոտ 100 հաճախորդ ունեի， իսկ այստեղ ընդամենը` 3-4: Դեռ 4 ամիս է， ինչ աշխատում ենք， տպարանը երեք ընկերներով ենք աշխատեցնում: Ժամանակ է պետք， որ մարդիկ իմանան մեր մասին: Տեքստիլի ոլորտը գնալով զարգանում է: Ես լավատես եմ և հույս ունեմ， որ Հայաստանում նույնպես արտադրողները կավելանան»:
Թերևս, դժվարություններն այսքանն էին: Ալեքսան Կարադանայանը պատմեց， որ հայկական կողմը ամեն կերպ փորձել է աջակցել սիրիահայերին， որոնց համար բոլոր դռներն էլ բաց են. «Երբ նոր էինք եկել， Հրանուշ Հակոբյանը հանդիպումներ կազմակերպեց ծանր， միջին և թեթև արդյունաբերության ոլորտի ներկայացուցիչների հետ: Հանդիպմանը ներկա էին նաև ՀՀ արդյունաբերության փոխնախարարը， հարկային դաշտի ներկայացուցիչը: Սիրիայում նման բան չկա， չես կարող խոսել նախարարի կամ փոխնախարարի հետ: Նրանց օգնությամբ մենք ծանոթություններ ձեռք բերեցինք և այսօր ունենք արդեն մի քանի պատվերներ: Սիրիայում այդ առումով ավելի հեշտ է， քանի որ կա արդյունաբերական շրջան， իսկ այստեղ մեկը Արգավանդում է գտնվում， մյուսը` Բանգլադեշում: Առաջին օրը մենք եկանք և հասկացանք， որ պետությունը մեր թիկունքին է կանգնած»:
Այն հարցին` արդյոք սիրիահայ գործարարը կցանկանա՞ վերադառնալ Հալեպ， պատասխանեց. «Ապագան ինձ համար դեռ անորոշ է: Եթե Սիրիայում իրավիճակը լավանա， միգուցե մեկնեմ և վերսկսեմ տպարանի աշխատանքները: Այնտեղի եկամուտով այստեղ կարող ենք լավ ապրել: Հայաստանում լավ է，բայց մեր տունը， ընկերները， տիկնոջս ծնողները， բոլորն այնտեղ են»:
Լուսինե ՇԱԽԱԶԻԶՅԱՆ
Տեսանյութը՝ Hottv-ի
