«Միջոցառման նպատակն է իրազեկ պահել աշակերտներին և, հատկապես, ավագ դպրոցի դպրոցականներին երկիր մոլորակի զարգացման, պատմության, առաջացման մասին եւ գիտելիքներ հաղորդել մի մոլորակի մասին, որի վրա ապրում ենք, որի բնակիչներն ենք մենք»,-այսօր Aravot.am-ի հետ զրույցում «Գիտելիքի օրվան» նվիրված «Ի՞նչ է պատմում Երկիր մոլորակը…» միջոցառումների շարքի մասին նշեց ՀՀ ԳԱԱ ԵԳԻ-ի Հովհաննես Կարապետյանի անվան երկրաբանական թանգարանի տնօրեն Գայանե Գրիգորյանը:
Նրա խոսքով՝ կապ է ստեղծվում աշակերտների եւ բնության միջեւ, բնական երեւույթների իմացության հետ: Նրանք պետք է երկիր մոլորակը ընդունեն այնպես, ինչպես աճող օրգանիզմ: Նախընտրել են բարձր դասարանի աշակերտների հետ հանդիպում կազմակերպել, քանի որ վաղը նրանց առջեւ մասնագիտական կողմնորոշման հարց կդրվի.
«Մենք աշխույժ թանգարանային կյանքով ենք ապրում, կազմակերպում ենք խաղեր, հանդիպումներ, էքսկուրսիաներ: Թանգարանը ֆորմալ կրթական միջավայր է, ունենք հարուստ ցուցանմուշների բազա, հանրությանը մենք տալիս ենք գիտելիքներ երկրի մոլորակի եւ օգտակար հանածոների մասին, անմիջական հարցազրույցի մեջ մտնելով լսում ենք այցելուների կարծիքը»:
Միջոցառմանը ներկա էին դպրոցականներ Երեւանից եւ տարբեր մարզերից:
Կոտայքի մարզի Եղվարդ քաղաքի «Պատանի գիտակներ» ինտելեկտուալ ակումբի անդամ Էլինա Գեղամյանի խոսքով՝ ինքնակրթության միջոցով երեխաների ու երիտասարդների զարգացումն է կարեւոր. «Մենք ցանկանում ենք համագործակցել թանգարանի հետ, իմ երկիրն ինձ համար մեծ նշանակություն ունի, սիրում եմ ճշտել, բացահայտել եւ զարգանալ: Պետք է լիովին ճանաչել սեփական երկիրդ, հայրենիքի դռները բաց են բոլորի առջեւ»:
Կարդացեք նաև
Անժելա ՇԱՀՈՒՄՅԱՆ
