Այսօր «Հայելի» ակումբում ասուլիսի հրավիրված հոգեբան Սամվել Խուդոյանը, անդրադառնալով երեկ ԵԽԽՎ-ում Զարուհի Փոստանջյանի պահվածքին, ասաց. «Այսօր ամեն ինչ կարելի է ասել, բայց դա չի կարող բացարձակ ճշմարտություն լինել: Վերջերս հաճախ ենք նման վատ իրավիճակների մեջ հայտնվում: Որպես կանոն, իշխանական թևը լռում է եւ չի պատասխանում այն ֆորմատով, որ պետք է պատասխաներ: Եթե զրպարտություն է, պետք է դատական գործ հարուցվի եւ ընթացք տրվի: Սա ակնհայտ պրովոկացիա է: Նման հարցը ցանկացած տեղ կարելի է բարձրացնել, բայց ոչ միջազգային հարթակներում»,-ընդգծեց Խուդոյանը:
Գրականագետ Վարդան Դեւրիկյանը, խոսելով Զարուհի Փոստանջյանի՝ նախագահի խաղատանը պարտվելու մասին հարցին, ասաց, որ նա չի հավատում, որ նախագահը նման բան է արել: «Մենք մեր ներքին կեղտը չպետք է հանենք արտաքին աշխարհի առաջ, այլ ներսում պետք է լվանանք: Նման հայտարարություններ անելը մեր երկրի շահերից չի բխում: Արտաքին աշխարհում ավելի համախմբված պետք է երեւանք: Զզվանք ապրեցի, երբ իմացա, որ Ստրասբուրգում երիտասարդները հանրահավաք են արել: Եթե բողոք ունեն, թող գան նախագահականի առաջ, ասենք, նստացույց անեն, բայց դրսում մեր ներքին խնդիրները չպետք է վեր հանեն: Վերքը պետք է բուժել մեր երկրի ներսում: «Ժառանգությունը» հայկական քողի տակ հակահայկական քարոզչություն է անընդհատ իրականացնում»,-ասաց Վարդան Դեւրիկյանը` հավելելով, որ այս հարցը ուրախություն է պատճառել միայն ադրբեջանցիներին:
Խուդոյանն էլ նշեց, որ հատուկ հետաքննություն պետք է լինի, քանի որ սա շատ լուրջ հարց է եւ այդ խոսակցությունները վաղուց էին պտտվում, որպեսզի պարզ դառնա, թե ինչու են նմանատիպ խոսակցություններ լինում:
Քրիստինա ՄԻՐԶՈՅԱՆ
