«Մենք մշակութային ժառանգության հետազոտություն ենք կատարում՝ ներկայացնում ենք հասարակությանը, իշխանությանը: Ամեն տարի Տիգրանակերտի արշավախումբը 120 էջանոց հաշվետվություն է ներկայացնում Լեռնային Ղարաբաղի զբոսաշրջության եւ պատմական միջավայրի պահպանության վարչությանը»,-այսօր լրագրողների հետ հանդիպման ժամանակ Տիգրանակերտի 2013 թ.-ի բացառիկ գտածոների, պեղումների ընթացքում հայտնաբերված նմուշների պատմական կարևորության մասին նշեց Տիգրանակերտի արշավախմբի ղեկավար Համլետ Պետրոսյանը:
Նրա համոզմամբ իրենց խումբը իրականացնում է գիտական աշխատանք եւ ներկայացնում հասարակությանը: Մշակութային քաղաքականությունը հասարակության մշակութային կյանքն է: Տիգրանակերտը մեզ հրապուրում է իր մեծ չափերով, պեղումներին մասնակցել են Ֆլորենցիայի համալսարանի երկու երկրաբան մասնագետներ.
«2010 թ.-ին բացվեց Տիգրանակերտի հնագիտական թանգարանը, այնտեղ տարեկան այցելում է 30 հազար զբոսաշրջիկ, թանգարանը վճարովի է՝ յուրաքանչյուր այցելուն վճարում է 250 դրամ, սակայն կարծում եմ, որ վճարն անիմաստ է: Մշակույթը անմիջական սպառման ապրանք չէ, այլ հասարակությանը առաջ մղելու գործիք»:
Բանախոսի պնդմամբ հուշարձանը պետք է պահպանել, իսկ զբոսաշրջությունը նյութերին վնասում է: Տիգրանակերտը եզակի հուշարձան է, որը նախաձեռնվել է անձնական նախաձեռնությամբ: Իրենք ուզում են հրապուրել, այլ ոչ թե գումար վաստակել: Ցանկացած բիզնես նախագիծ չպետք է վնասի հուշարձանը:
Անժելա ՇԱՀՈՒՄՅԱՆ
