Այսօր Ավան եւ Նոր Նորք վարչական շրջանների ընդհանուր իրավասության դատարանում, ուր վերսկսվել էր «Հարսնաքար» ռեստորանային համալիրում անցյալ տարվա հունիսին Վահե Ավետյանի եւ նրա ընկերների նկատմամբ բռնությունների գործը, հայտարարվել է ընդմիջում:
Մեղադրող Արմեն Մարուխյանը որեւէ միջնորդություն չուներ, իսկ դատավոր Դավիթ Հարությունյանը տեղեկացրեց, թե քանի որ դատաքննությունը վերսկսվել է, ամբաստանյալները լրացուցիչ ցուցմունքներ են տվել նախորդ դատական նիստին, ուստի պետք է հարցաքննվեն տուժողները, որպեսզի դատաքննությամբ ձեռք բերված ապացույցներին լրացուցիչ իրավական գնահատական տրվի:
Տուժողներ Արկադի Աղաջանյանը, Արտակ Բայադյանը, Գարիկ Սողոմոնյանը եւ Էդգար Նիկոյանը դատարան չէին ներկայացել, իսկ դատավորի հարցին, թե որտեղ են, ինչու չեն եկել, տուժողի ներկայացուցիչ Տիգրան Եգորյանը պատասխանեց, որ հայտնի չէ:
Ի դեպ, կարճ ընդմիջում հայտարարվեց տուժողներին գտնելու համար: Միայն մեկ տուժողից տեղեկություն ձեռք բերվեց՝ Արտակ Բայադյանը վիրահատվել է: Դատական հաջորդ նիստը նշանակվել է երկուշաբթի, ժամը 16.00-ին:
Կարդացեք նաև
Ռուզան ՄԻՆԱՍՅԱՆ
