«Ազատություն» ռադիոկայանը հաղորդել էր, որ Եվրոպական խորհրդարանը հոկտեմբերի 23-ի նիստում կողմ քվեարկեց Արևելյան հարևանության երկրների հետ հարաբերությունների ամրապնդման և մինչ այսօր գրանցած առաջընթացն ու անհաջողությունները ներկայացնող բանաձևի փոփոխություններին:
Այդ բանաձեւում անդրադարձ կա նաև Արևելյան հարևանության տարածքում առկա հակամարտություններին, որոնք, ըստ Եվրոպական խորհրդարանի, պետք է լուծվեն ինքնիշխանության, տարածքային ամբողջականության և ազգերի ինքնորոշման իրավունքի սկզբունքների հիման վրա: Մասնավորապես, ասվում է, որ Եվրամիությունը ավելի ակտիվ պետք է ներգրավվի հակամարտությունների խաղաղ լուծման գործում:
Տեքստում կա հետեւյալ միտքը՝ Լեռնային Ղարաբաղի հակամարտության լուծումը պետք է համապատասխանի ՄԱԿ-ի Անվտանգության խորհրդի 1993 թվականի 4 բանաձևերին և ԵԱՀԿ-ի Մինսկի խմբի հիմնարար սկզբունքներին՝ ամրագրված 2009 թվականի լ՛Աքվիլայի համատեղ հայտարարությամբ: ՄԱԿ-ի այդ բանաձեւերը հայկական կողմի համար ընդունելի չեն մասնավորապես նրանով, որ դրանցում խոսք է գնում նաեւ ազատագրված տարածքների հանձնման մասին:
«Առավոտը» Հայաստանի՝ եվրոպական կողմնորոշում ունեցող փորձագետներից հետաքրքրվեց, թե ինչպես են գնահատում այս բանաձեւը:
Կարդացեք նաև
«Եվրասիա» համագործակցության հիմնադրամի տնօրեն Գեւորգ Տեր-Գաբրիելյանը նկատեց, որ դեռ սեպտեմբերի 5-6 –ին է ինքը կանխատեսել, որ ՄՄ մտնելու մասին Սերժ Սարգսյանի հայտարարությունից հետո Եվրամիությունից գալու է ղարաբաղյան հակամարտության վերաբերյալ շատ ավելի կոշտ դիրքորոշում. «Դա էլ հիմա կատարվում է, մինչ այդ էլ եղավ՝ որոշ երկրների կողմից»:
Երեւանի մամուլի ակումբի ծրագրերի համակարգող Հայկակ Արշամյանը նախ նշեց, որ ինքն իրեն Ղարաբաղի հարցով մասնագետ չի համարում, բայց նաեւ ավելացրեց. «Որքան հասկանում եմ՝ եվրոպացիները փորձում են ինչ-ինչ լծակներ գործադրել, սակայն իրենց անդրադարձը չի հակասում մադրիդյան սկզբունքներին, ոչ էլ իրենց վարած քաղաքականությանն ու դիրքորոշմանը: Այս ամենը պետք է դիտարկել երեկ Սերժ Սարգսյանի կողմից եվրասիական ինտեգրման ավելի խորացմանն ուղղված քայլի համատեքստում նույնպես»:
Մելանյա ԲԱՐՍԵՂՅԱՆ
Կիսագրագետ մարդու՝ կիսագրագետ քաղաքականություն: