Թուրքիան խորացնում է ջանքերը Կովկասում կայունություն և խաղաղություն հաստատելու համար, ասել է Թուրքիայի արտգործնախարար Ահմեդ Դավութօղլուն նոյեմբերի 20-ին խորհրդարանի բյուջետային հանձնաժողովում արտաքին գործերի նախարարության հաջորդ տարվա բյուջեի քննարկման ժամանակ: Հայտնում է «Հյուրիեթ» թերթը:
«Կովկասում խաղաղություն հաստատելու ժամանակն է», – ասել է Դավութօղլուն՝ նշելով, որ Վաշինգտոն կատարած վերջին այցի ժամանակ իրենք Մինսկի խմբի գործընթացը նորից կյանքի կոչելու հարցը քննարկել են ԱՄՆ պետքարտուղար Ջոն Քերիի հետ, ինչպես նաև պատրաստվում են այն քննարկել Ռուսաստան կատարելիք այցի շրջանակներում:
Դավութօղլուն շեշտել է, որ հայ-թուրքական հարաբերությունների բարելավումը կշարունակի պահպանվել Ղարաբաղի խնդրի կարգավորմանը զուգահեռ:
Թերթը գրում է, որ Սևծովյան տնտեսական համագործակցության երևանյան գագաթնաժողովին հրավեր ստանալու հետ կապված նախարարն ասել է, որ երկու երկրների միջև խնդիրները խոչընդոտ չեն նման հանդիպումներին մասնակցելու համար: Նա նշել է, որ նույնիսկ Ադրբեջանն է նման հրավեր ստացել Հայաստանից:
Կարդացեք նաև
Դավութօղլուն Երևան գալը չի բացառել, բայց նշել է, որ նույն օրը նա հանդիպում ունի Գերմանիայի նախագահ Յոահիմ Գաուկի հետ:
Նոյեմբերի 21-ին «Միլիյեթ» թերթը հաղորդել էր, որ Դավութօղլուն, մեկնաբանելով Հայաստանից ստացած հրավերը, ասել էր, որ այն սովորական գործընթաց է և պետք չէ կենտրոնանալ դրա վրա:
Պատրաստեց Հովհաննես ԻՇԽԱՆՅԱՆԸ
