Այսօր «Նոյյան Տապանի» մամուլի սրահում ադրբեջանագետ Սարգիս Ասատրյանը խոսելով ՌԴ նախագահ Վլադիմիր Պուտինի այցի, հայ-ադրբեջանական հարաբերությունների մասին, կարծիք հայտնեց, որ Մաքսային միությանը անդամակցելու դեպքում մենք պետք է առաջին հերթին հաշվի առնենք, թե ինչպիսին կլինի ադրբեջանցիների ռեակցիան:
Սարգիս Ասատրյանի փոխանցմամբ`ադրբեջանցիները կփորձեն այս իրադարձություները ներկայացնել հետեւյալ կերպ. իբրեւ թե Պուտինն ամեն ինչ կանի, որ Ադրբեջանը նույնպես ներքաշվի այդ ամենի մեջ:
Սարգիս Ասատրյանը գտնում է, որ Ադրբեջանին անհանգստացրեց այն հանգամանքը, որ Հայաստանը զենք կստանա Ռուսաստանից ներռուսական գներով. «Ադրբեջանը փորձում է դիվերսիֆիկացնել զենքի շուկան եւ իրեն որոշակիորեն ապահովագրել տարածաշրջանային մարտահրավերներից ու հայկական սպառնալիքից»:
Սարգիս Ասատրյանը նկատեց, որ վերջին օրերին ռազմատենչ հայտարարություններ Ադրբեջանի կողմից չկան, ու դա պայմանավորված էր Պուտինի` Հայաստան կատարած այցի հետ`«Ռուսաստանի ազդեցությունը զսպիչ դեր է խաղում»:
Կարդացեք նաև
Պուտինի այցի հետ կապված`Սարգիս Ասատրյանը նաեւ հավելեց, բնական է, որ հնչում են կարծիքներ, թե Հայաստանը կորցնում է իր անկախությունը, կամ քիչ է մնում մտնի Ռուսաստանի կազմի մեջ:
«Ադրբեջանը մեծապես կախում ունի արեւմուտքից, բայց այժմ հայտնվել է ծանր վիճակում»,- վստահեցրեց նա:
Սարգիս Ասատրյանը ավելացրեց, որ այժմ Ռուսաստանի համար ակտուալ է հետեւյալ խնդիրը` իր նորաստեղծ բլոկի մեջ ներառել շատերին, թեեւ`«Մենք դժվար ենք պատկերացնում Ադրբեջանին եւ Հայաստանին նույն բլոկում»:
Եվա ՀԱԿՈԲՅԱՆ
