Ուզբեկստանի նախագահ Իսլամ Կարիմովի դուստրը՝ Գյուլնարա Կարիմովան իր կոռուպցիոն գործարքների մեջ ներգրավել է նաև մի հայ աղջկա: Գրում է «Բի ԲԻ Սի»-ն՝ անդրադառնալով Կարիմովայի անկմանը, որը թեպետ համարվում էր երկրի ապագա հավանական առաջնորդը, բիզնես-կայսրության տիրակալ էր, սակայն այժմ ամեն ինչ կորցրել է:
2012թ. Շվեդիայից մի խումբ լրագրողներ զբաղվում էին ֆին-շվեդական հեռահաղորդակցական հսկա ընկերության՝ «TeliaSonera»-ի հետաքննությամբ: Պարզվել էր, որ ընկերությունը 300 միլիոն դոլար է մուծել, որպեսզի մտնի ուզբեկական շահութաբեր շուկա: Գումարը փոխանցվել է Ջիբլարթարում գրանցված փոքրիկ ընկերության հաշվին, որը գրանցված է Գայանե Ավագյանի անունով, որը որևէ կապ չունի հեռահաղորդակցական բիզնեսի հետ:
Կարիմովային մոտ կանգնած աղբյուրները հավաստում են, որ Ավագյանը, որը 20-ն անց է, աշխատում էր Կարիմովայի Տաշքենդի կոշիկի բազմաթիվ խանութներից մեկում: Այնուհետև նա նախագահի դստերը օգնել է Մոսկվայում նորաձևության իր ցուցադրությանը: Նա շատ արագ դարձել է Կարիմովայի ամենահավատարիմ օգնականներից մեկը, իսկ 2013թ. հայտնվել աշխարհի ամենամեծ կոռուպցիոն սկանդալներից մեկի կենտրոնում: Այս գործը համարվում է Կարիմովայի անհաջողությունների հիմնական պատճառը:
Պատրաստեց Հովհաննես ԻՇԽԱՆՅԱՆԸ
