Հունվարի ընդամենը 22 օրերի ընթացքում արդեն Հայաստանում գրանցվել է 142 ճանապարհատրանսպորտային պատահար (ՃՏՊ), որի արդյունքում 217 վիրավոր եւ 14 զոհ կա: Թեեւ 22 օրվա համար 14 զոհը լուրջ թիվ է, սակայն նախորդ տարվա համեմատ վեցով պակաս է: Այս մասին այսօր «Հայացք» ակումբում ասաց ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:
Ամփոփելով 2013թ-ը, պարոն Սարգսյանն ասաց, որ տարվա ընթացքում գրանցվել է 2824 պատահար, որի արդյունքում զոհվել է 316, 3994 մարդ մարմնական վնասվածք է ստացել:
Երեւանում, չնայած պատահարների թիվը նույնպես աճել է, մահվան դեպքերը երկուսով պակասել են: Դա պարոն Սարգսյանը սա կապում է արագաչափերի եւ տեսախցիկների գոյության հետ, քանի որ մահվան ելքեր լինում են հիմնականում բարձր արագության պարագայում:
Պարոն Սարգսյանի ներկայացրած վիճակագրության համաձայն՝ աճել է նաեւ անսթափ վիճակում հայտնաբերված վարորդների թիվը: Եթե 2012-ին գրանցվել էր 1477 անսթափության դեպք, ապա նախորդ տարի՝ 2745: Գնդապետ Սարգսյանն այս բոլոր աճերը պայմանավորում է ինչպես մեքենաների քանակի կտրուկ՝ գրեթե կրկնակի աճով, այնպես էլ՝ խախտումները գրանցելու հաճախականությամբ:
Կարդացեք նաև
Ի դեպ, նախորդ տարի, ՃՈ ոստիկանները եւ արագաչափ ու տեսանկարահանող սարքերը միասին արձանագրել են ավելի քան 1,2 մլն խախտում:
Գնդապետը ներկայացրեց նաեւ երեխաների մասնակցությամբ ՃՏՊ-ների քանակը: Նախորդ տարի դրանք կազմել են 303, եւ դրանց կեսը՝ 154-ը, հետիոտների վրաերթի դեպքեր են: Այս պարագայում պարոն Սարգսյանը խիստ կարեւորում է, որ դպրոցներում եւ ընտանիքներում երեխաների շրջանում բացատրողական աշխատանք տարվի: Այնինչ հաճախ տեսնում ենք հակառակը՝ մայրը, տատիկը, հայրը երեխայի ձեռքը բռնած անցնում են կարմիր լույսի տակով՝ ի՞նչ պետք է սովորի այդ երեխան, եւ ո՞վ կկրի նրա հետ պատահած դեպքի պատասխանատվության գոնե մի մասը:
Մելանյա ԲԱՐՍԵՂՅԱՆ
