«Պետք է արմատախիլ անել հովանավորչությունը, որը ստեղծում է անպատժելիության մթնոլորտ, ինչը պարարտ հող է այս կամ այն հանցագործության համար: Բազմաթիվ բարձրաստիճան սպաներ, գեներալներ պիտի կողմնորոշվեն՝ իրենք ծառայո՞ւմ են, թե՞ բիզնեսով են զբաղվում: Հաճախ նրանք չեն տարանջատում սեփական բիզնեսը ծառայությունից, նույնիսկ ծառայությունը օգտագործում են անձնական բիզնեսի ծաղկման ու զարգացման համար: Մի շարք հրամանատարներ՝ սկսած կրտսեր անձնակազմից, վերջացրած որոշ զորամիավորումների հրամանատարներով, կամ իրենց տեղում չեն, չգիտեն ինչ անել, կամ գիտեն, պարզապես իրենց ֆունկցիոնալ պարտականությունների կատարման հարցում ցուցաբերում են հանցավոր անտարբերություն: Ցանկացած դեպքում՝ լինի կարգապահական խախտում կամ հանցագործություն, անկախ զբաղեցրած դիրքից, ուսադիրների աստղերի տրամաչափից, քավոր-սանիկական կամ այլ բարեկամական կապերից, եթե ունի աննշան մեղքի բաժին, պետք է օրենքի սահմաններում ենթարկվի խիստ պատասխանատվության: Բավարար պրոֆիլակտիկ բնույթի աշխատանքներ չեն տարվում՝ դաստիարակչական, հանցագործությունների կանխման, նախականխման ուղղությամբ»,- բանակում տիրող թերությունները ներկայացրեց պահեստազորի գնդապետ Աշոտ Զաքարյանը:
«Առավոտ» օրաթերթ
