ԲՀԿ համագումարի ավարտից հետո ԲՀԿ ներկայացուցիչներ՝ ԱԺ պատգամավորներ Նաիրա Զոհրաբյանն ու Վարդան Օսկանյանը պատասխանեցին լրագրողների հարցերին:
Մասնավորապես, այն հարցին, թե ինչո՞ւ չեք պահանջում Սերժ Սարգսյանի հրաժարականը, այլ՝ միայն կառավարության, ԲՀԿ փոխնախագահ, Հայաստանի արտաքին գործոց նախկին նախարար Վարդան Օսկանյանը պատասխանեց, որ այսօր չորս քաղաքական ուժերի օրակարգում կառավարության հրաժարականի հարցն է, քանի որ այն բոլոր դժգոհությունները, որ կան, հիմնականում կառավարության լուծելիք խնդիրներին են վերաբերվում՝ կոռուպցիա, կուտակային կենսաթոշակներ եւ այլն, թեեւ նշեց, որ իրենք նաեւ հստակ գիտեն գլխավոր մեղավորին եւ «ոչինչ չեն բացառում»:
Իսկ Նաիրա Զոհրաբյանն ավելացրեց, որ չկա որեւէ հարց, որը քննարկելի չլինի չորս ուժերի շրջանում՝ ԲՀԿ, ՀԱԿ, ՀՅԴ, «Ժառանգություն», ինչպես նաեւ չկա Հայաստանում որեւէ պաշտոնյա, որն անփոխարինելի է եւ կարող է կարծել, թե իր պաշտոնը ժառանգական է. «Մենք արձագանքելու ենք ժողովրդի կողմից եկած իմպուլսներին»:
Հետաքրքիր էր, որ հարցին, թե ո՞ր օրենքը կվերացնեին, եթե հնարավորություն ունենային, տիկին Զոհրաբյանը պատասխանեց կհանեինք կուտակային ռեֆորմը՝ պարտադիրի մասով, ինչպես նաեւ կվերանայեին այն բոլոր օրենքները, որոնք կոտրել են միջին ձեռներեցության մեջքը: Իսկ Վարդան Օսկանյանը խոսեց «փողոցի կարմիր գծերի» եւ հարկային ծանր բեռի մասին:
Կարդացեք նաև
Ի դեպ, կուտակային կենսաթոշակների մասին խոսելիս՝ տիկին Զոհրաբյանն ասաց, որ նման բարեփոխումներ կարող էր անել հասարակության մոտ վստահության պաշար ունեցող եւ նախկին ծրագրերը չտապալած կառավարությունը, իսկ ներկայիս կառավարությունը չունի նման բարեփոխում անելու ոչ բարոյական, ոչ էլ պրոֆեսիոնալ իրավունք ուներ գնալու նման բարեփոխումների:
Մանրամասները՝ տեսանյութում:
Պատասխանելով եւս մի քանի հարցերի՝ նրանք գնացին մասնակցելու ԲՀԿ նորընտիր քաղխորհրդի նիստին:
Մելանյա ԲԱՐՍԵՂՅԱՆ
