Նորակոչիկ Մհեր Արմենի Խլղաթյանին ծեծի ենթարկելու, պարտադիր ժամկետային զինծառայողներ Էդիկ Շահնազարյանի և Արշակ Զարդարյանի՝ հիվանդության պատճառով մահվան փաստի առթիվ նշանակված ծառայողական քննություններն ավարտվել են, զորամասերի հրամանատարները նկատողություն են ստացել, իսկ Մհեր Խլղաթյանի և Էդիկ Շահնազարյանի գործերով բժիշկներն ազատվել են աշխատանքից: Այդ մասին «Փաստինֆո»-ի թղթակցին ասաց ՀՀ ՊՆ մամլո խոսնակ Արծրուն Հովհաննիսյանը: Նորակոչիկ Մհեր Խլղաթյանին ծեծի ենթարկելու գործով՝ նկատողություն են ստացել զորամասի հրամանատարները, իսկ բժիշկներն ազատվել են պաշտոնից, այդ թվում նաև` բուժծառայության պետ, կապիտան Արման Թադևոսյանը, ով, ի դեպ, քրեական գործով ներգրավվել է նաեւ որպես մեղադրյալ։ Հիշեցնենք, որ Մհեր Խլղաթյանը հունվարի 13-ի գիշերը՝ ժամը 02:10-ի սահմաններում, ՀՀ ՊՆ Վարդենիսի զինվորական հոսպիտալից երկկողմանի թոքաբորբ ախտորոշմամբ, մարմնական վնասվածքներով տեղափոխվել է ՀՀ ՊՆ կենտրոնական կլինիկական զինվորական հոսպիտալ: Փաստի առթիվ հարուցվել է քրեական գործ` ՀՀ քրեական օրենսգրքի 376-րդ հոդվածի 2-րդ մասով՝ անփույթ վերաբերմունքը ծառայության նկատմամբ, եթե անզգուշությամբ առաջացրել են ծանր հետևանքներ, և 358.1րդ հոդվածի 2-րդ մասով` զինվորական ծառայության պարտականությունները կատարելու կապակցությամբ ստորադասի նկատմամբ բռնություն գործադրելը: Գործով կալանավորվել են 4 անձինք:
Նյութի մանրամասները կարդացեք սկզբնաղբյուր կայքում
