Այսօր «Պոստ Սկրիպտում» մամուլի ակումբի հյուրերն էին Երևանի թատրոնի և կինոյի պետական ինստիտուտի Ուսումնական թատրոնի տնօրեն Էրիկ Բարսեղյանը, ՀՀ վաստակավոր արտիստ Լալա Մնացականյանը և դերասան Արմեն Կարապետյանը:
Հանդիպման թեման փետրվարի 20-ին`ժամը 18:00-ին կայանալիք «Մայրը» ներկայացումն էր, որը նվիրվում է Արմեն Մազմանյանի հիշատակին: Ներկայացումը տեղի է ունենալու Ուսումնական թատրոնում: «Փետրվարի 21-ին ԵԹԿՊԻ ռեկտոր, ՀՀ արվեստի վաստակավոր գործիչ, Արցախյան գոյամարտի մասնակից Արմեն Մազմանյանը պետք է նշեր իր ծննդյան 54-ամյակը: Այդ առիթով մենք որոշեցինք բեմադրել չեխ դրամատուրգ Կարել Չապեկի «Մայրը» պիեսը և նվիրել Արմեն Մազմանյանի հիշատակին»,- ասաց ԵԹԿՊԻ Ուսումնական թատրոնի տնօրեն Էրիկ Բարսեղյանը:
Մինչ այս, նախորդ ներկայացումը նվիրված էր ազգային հերոս Մովսես Գորգիսյանին: «Ներկա էին նրա դուստրը, հարազատները, զինակից ընկերները: Եվ որոշվեց, որ այսուհետ «Մայրը» ներկայացումն ամեն անգամ պետք է նվիրենք մեր հերոսներից կամ ազատամարտիկներից մեկին: Եվ այս անգամ, ցավոք, այնպես ստացվեց, որ ներկայացումը նվիրեցինք Արմեն Մազմանյանին»,- ասաց պրն Բարսեղյանը:
«Կգա մի պահ, որ կարող է մոռացվեն այդ հերոսները: Մենք մեր հոգու պարտքն ենք կատարում՝ ամեն անգամ նրանց հիշատակելով: Ներկայացումը միջոց է դառնալու նրանց մասին խոսելու»,- ասաց ՀՀ վաստակավոր արտիստ Լալա Մնացականյանը:
Կարդացեք նաև
Նա նաև նշեց, որ պիեսի վերջաբանը ներկայացման մեջ այլ է: «Պիեսում մայրը զենքը տալիս է որդուն, իսկ մեր բեմադրության մեջ մայրը որդուն ճանապարհում է, և դրանով ավարտվում է ներկայացումը: Այսինքն, գաղափարն այն է՝ ես չեմ գնում պատերազմելու, ես պաշտպան եմ կանգնում իմ հայրենիքին: Այս ներկայացման մեջ դաստիարակվում է մարդկային և ազգային արժանապատվությունը»,- ասաց տիկին Մնացականյանը:
«Այս ներկայացումը հատկապես պետք է նայեն երիտասարդները, որովհետև հասուն տարիքում մենք գիտենք, թե ինչ է կյանքը, իսկ երիտասարդները դեռ մինչև վերջ չգիտեն: Ներկայացման մեջ դրված են ներանձնական, ընտանեկան, եղբայրական հարաբերություները, նրանց ջերմությունը, մեկը մյուսին փայփայելը»,- ասաց ներկայացման գլխավոր դերակատար Արմեն Կարապետյանը:
Նշենք նաև, որ հրավեր են ստացել Չեխիայի Հանրապետությունում ՀՀ-ի արտակարգ և լիազոր դեսպան Տիգրան Սեյրանյանից, և «Մայրը» ներկայացումը հանդես է գալու այնտեղ:
Վարդուհի ԲԱԼՅԱՆ
