«Ինչո՞ւ եք ընդդիմության գործելակերպի մեջ անպայման ուզում վերջը տեսնել։
Իրենք մեզնից լավ գիտեն, որ անվստահության գործընթացը մինչև վերջ չեն կարող տանել։ Բայց դա ընդդիմության խնդիրը չէ, նա իր առջև այլ նպատակ է դրել»,- մեզ հետ զրույցում, անդրադառնալով կառավարությանն անվստահություն հայտնելու հարցին, ասաց ԱԺ ՀՀԿ խմբակցության անդամ ՀԱՄԼԵՏ ՀԱՐՈՒԹՅՈՒՆՅԱՆԸ։
– Ի՞նչ նպատակ է հետապնդում խորհրդարանական ընդդիմությունը։
– Հարցը պահում է թեժ, հույս ունենալով, որ ինչ-որ մի ժամանակ կհասնի իր նպատակին։
– Հույս ունեն, որ մեծամասնության անդամներից կմիանա՞ն իրենց։
Կարդացեք նաև
– Քաղաքական գործելակերպերի վերջը դժվար է գուշակել։ Նրանք պայքարում են իշխանափոխության համար։ Բոլոր ընդդիմություններն էլ նույն նպատակն են հետապնդում։
– Հետաքրքիր է, որ ամբողջական իշխանափոխություն են ուզում ՀԱԿ-ն ու «Ժառանգությունը», իսկ վարչապետի հրաժարականը ցանկանում է ԲՀԿ-ն, այն էլ՝ նրա փոքրաթիվ հատվածը։ Ստացվում է, կառավարության հրաժարականի հարցն այս կուսակցության որոշ անդամների ցանկությո՞ւնն է։
– Այն կուսակցությունները, որոնք իշխանության մեջ չեն, ձգտում են դառնալ իշխանություն։ Իշխանությունը քաղցր բան է, բոլորն էլ ուզում են իշխանավոր դառնալ։
– Նրանք ամբողջ իշխանությունը չեն ուզում, այլ իշխանության մի օղակը՝ վարչապետի աթոռը։
– Դուք այդպե՞ս եք կարծում։ Ես այդպես չեմ համարում։
– Կառավարության հրաժարականի պահանջը դրա մասին չի՞ վկայում։
– Կառավարության հրաժարականը ենթադրում է անվստահություն ողջ իշխանության հանդեպ։ Ես այսպես եմ հասկանում։ Իրենց գործելակերպի արդյունքում հնարավոր է Սերժ Սարգսյանի անունը չտան, բայց ի՞նչ տարբերություն, դա Սերժ Սարգսյանի ձևավորած կառավարությունն է, և սլաքն ուղղակիորեն նրան է ուղղված։ Էդ ինչո՞ւ են բոլորն իրենց անհասկացողի տեղ դնում։ Եթե որևէ ուժ պահանջում է վարչապետի հրաժարականը, որին ընտրել է գործող մեծամասնությունը, որի ղեկավարը երկրի նախագահն է, ի՞նչ է ստացվում՝ հրաժարականի պահանջ ամբողջ իշխանության համար։ Այս ամենն ուղղված է երկրի նախագահի դեմ, կուսակցության դեմ, կուսակցական ղեկավարության դեմ:
Ճեպազրույցը՝ Ռուզան ԽԱՉԱՏՐՅԱՆԻ
Հոդվածն ամբողջությամբ կարող եք կարդալ «Իրատես de facto» թերթի այսօրվա համարում
