Ստեփան Հակոբյանի (ԱԺ պատգամավոր Հակոբ Հակոբյանի եղբորորդին) պաշտպան, ՀՀ փաստաբանների պալատի անդամ Երեմ Սարգսյանի վերաքննիչ բողոքը ներկայացնելուց հետո պատասխան խոսքով հանդես եկավ մեղադրանքի կողմը՝ դատախազ Արմեն Մարուխյանը: Նա ասաց, որ անցյալ տարվա դեկտեմբերի 9-ի դատավճիռը, որով 15 տարվա ազատազրկման է դատապարտվել Ստեփան Հակոբյանը, օրինական է:
Արմեն Մարուխյանն ասաց, որ պետք է մերժվի տուժողի իրավահաջորդ Յորդանյանի վերաքննիչ բողոքը եւս, որով նա պահանջել էր վերաքննիչ դատարանից, որպեսզի 15 տարվա ազատազրկումը լինի ցմահ ազատազրկում: Ըստ դատախազի՝ առաջին ատյանի դատարանի կողմից պատժի չափը համաչափ է եղել եւ արարքի հիմնավորման առումով դատարանի կայացրած ակտը պետք է մնա ուժի մեջ:
Դատախազն անդրադարձավ նաեւ «փակ վկա» Ահարոն Հակոբյանի նախաքննության ժամանակ տված ցուցմունքին եւ նաեւ խոշտանգումների մասին պաշտպան Երեմ Սարգսյանի ասածին, հայտնելով, որ վկան ասել է, թե խոշտանգումներից հետո ինքը լքել է Հայաստանի Հանրապետությունը, սակայն իրականում նա ստել է եւ ցուցմունք տալուց հետո երկու տարի մնացել է Հայաստանում:
Դատավորներ Գրիշա Մելիք-Սարգսյանը, Կարինե Ղազարյանը եւ Հենրիկ Տեր-Ադամյանը խորհրդակցական սենյակից դուրս գալով մերժեցին բողոքները եւ առաջին ատյանի դատարանի դատավճիռը մնաց անփոփոխ:
Կարդացեք նաև
Դատարանի դահլիճում, բացի Ստեփան Հակոբյանի ընկերներից, մերձավորներից, որեւէ մեկը չկար: Հրապարակմանը ներկա չէին թե դատախազը, թե տուժողի իրավահաջորդը, որն առաջին նիստին ներկայացել էր միայնակ՝ առանց իր ներկայացուցչի:
Ռուզան ՄԻՆԱՍՅԱՆ
