«Ամերիկյան կողմի համար հայոց ցեղասպանությունը առավելապես քաղաքական առևտրի առարկա է»,-այսօր անդրադառնալով ԱՄՆ Սենատի արտաքին հանձնաժողովի կողմից հայոց ցեղասպանության վերաբերյալ բանաձևի ընդունման փաստն այսպես մեկնաբանեց թուրքագետ Ռուբեն Մելքոնյանը: Նա նկատեց, թե ԱՄՆ-ն մի կողմից Թուրքիայի վրա ճնշումներ է բանեցնում, մյուս կողմից աշխարհաքաղաքական բևեռացումների համատեքստում է:
Ըստ պարոն Մելքոնյանի ապրիլի 24-ին ընդառաջ ԱՄՆ-ն հայերին սիրաշահելու մտադրություն ունի: Նա շարունակեց. «Այս քայլերը միայն սառը քաղաքական հաշվարկների համատեքստում են տեղավորվում: Սրանք իրականում քայլեր չեն, այլ կիսաքայլեր»:
Պարոն Մելքոնյանը հայոց ցեղասպանությանն ընդառաջ թուրքական կողմից որոշ «ջղաձգումներ» է նկատում ու նշում. «Թուրքական կողմն իր հռչակած քաղաքականության գերին է և ամեն անգամ ստիպված է լինում որոշակի քայլեր անել հակադարձելու համար: Թուրքական հակադարձումների ֆորմատը լայնանում է, բացի ագրեսիվ ավանդական մեթոդներից, նրանք ունեն մեկ այլ ուղղվածություն. քողարկված արտաքուստ տոլեռանտությամբ քայլեր են, որոնց խորքում հակահայկականություն կա»:
Թուրքագետը նաև նշեց, որ հայ-թուրքական դիվանագիտական հարաբերությունների՝ երկար ժամանակով զարգանալու հույսեր չկան:
Կարդացեք նաև
Aravot.am-ի հարցին՝ ինչպե՞ս կմեկնաբանի Ադրբեջանի ԱԳ նախարար Մամեդյարովի այն հայտարարությունը, թե «Կողմնակից ենք ԼՂ-ին ամենաբարձր մակարդակի ինքնավարություն տրամադրելուն», պարոն Մելքոնյանը պատասխանեց. «Դա ադրբեջանական հռետորաբանության քիչ արծարծվող կետերից է: Դա նորություն չէ, մի քանի անգամ ևս ադրբեջանական կողմը հայտարարել է և կարծում եմ հաշվարկել է ադրբեջանական կողմը Ղրիմի և մյուս օջախների հետ կապված հաշվարկներ է արել: Դրանք ամենաերևակայական իրականությունում հնարավոր չէ պատկերացնել, քանի որ Արցախը և ժողովրդավարության առումով, և տարբեր այլ ինստիտուցիոնալ առումներով առավել է, քան Ադրբեջանը և չի կարող ավելի բարձր ժողովրդավարություն ունեցող պետությունը մաս կազմել սուլթանական պետության»:
Տաթև ՀԱՐՈՒԹՅՈՒՆՅԱՆ
