«Մարտի 1-ին ոչ թե տեղի է ունեցել ոստիկանության ուժերի եւ խաղաղ ցուցարարների բախում, դա ընդամենը մի դրվագ է , մարտի 1-ին տեղի է ունեցել պետության զավթում այդ ժամանակ գործող իշխանությունների կողմից եւ այդ զավթումը ոչ միայն իրականացվել է ոստիկանական ուժերի ներգրավմամբ, այլ նաեւ պետական ապարատի ողջ ռեսուրսներով»,- այսօր՝ մայիսի 20-ին, լրագրողների հետ հանդիպման ընթացքում հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Նրա խոսքերով՝ 2013 թվականի հոկտեմբերին իրենք գրություն են ուղարկել ՀՔԾ՝ պահանջելով ներկայացնել տեղեկություն քննության արդյունքների վերաբերյալ, սակայն ՀՔԾ-ն հայտնել է, որ իրենք նպատակահարմար չեն գտնում հրապարակել նման տեղեկատվությունը, իսկ ՀՔԾ-ին եւ գլխավոր դատախազին արված այն առաջարկին, թե որ պաշտոնատար անձանց պետք է քննել, դատախազությունից չեն պատասխանել, իսկ ՀՔԾ-ն հայտարարել է, որ քրեական դատավարության օրենսգրքով նախատեսված չէ դիմումատուին տալ քննչական գործողությունների վերաբերյալ տեղեկությունների ընթացակարգը:
«Փոխվել է ՀՔԾ պետը, փոխվել է քաղաքական ղեկավարությունը, հանձինս հանրապետության նախագահի, բայց կամքը, Մարտի 1-ի հանցագործության բարձրացման ուղղությամբ, մնացել է նույնը»:
Պարոն Սաքունցը հայտարարեց, որ ապրիլին իրենց հրապարակած «Մարտի 1-ի» ցուցակը անհրաժեշտ է համարում լրացնել մի շարք մարդկանցով եւ առաջին հերթին ցուցակում պետք է ընդգրկվեն մարզպետները, եւ պետք է ճշտել, թե որտե՞ղ են նրանք գտնվել, նամանավանդ, Սյունիքի նախկին մարզպետ Սուրիկ Խաչատրյանը:
Կարդացեք նաև
«Նմանապես կավելացնեի Ռուբեն Հայրապետյանի անունը, որը «Հարսնաքարի» դեպքերից շատ չոր դուրս եկավ, այսինքն՝ մարդիկ, ովքեր բավականին մեծ ծառայություններ են մատուցել «Մարտի 1-ի» գործում: Բնապահպանության նախարարը, ի՞նչ նշանակություն է ունեցել, որտե՞ղ է գտնվել, փոխվարչապետ, Տարածքային կառավարման նախարար Հովիկ Աբրահամյանը»:
Ցուցակի մեջ մտնում են նաեւ ԱԺ նախկին պատգամավորներ Հարություն Փամբուկյանը, Մնաց Մնացականյանը, Լեւոն Սարգսյանը:
Ամի ՉԻՉԱԿՅԱՆ
